Monkey Attack Dog In Beed : बीडमध्ये वानरांचा धुमाकूळ, एका महिन्यात सव्वाशेहून अधिक श्वानांचा घेतला बळी

बीड जिल्ह्यातील माजलगावपासून 10 किलोमीटर अंतरावर लवूळ हे गाव आहे. या ठिकाणी मागील दीड ते दोन महिन्यांपासून तीन वानरांचा वावर आहे. हे वानर मागील एक महिन्यापासून गावात असलेली श्वानाची पिल्ले उचलून घेऊन जात आहेत. हे वानर या पिलांना उंच झाडावर किंवा घरावर घेऊन जाऊन त्या ठिकाणांवरून या पिलांना फेकून देत आहेत. उंचीवरून पडल्याने अनेक पिलांचा जागीच मृत्यू झाला ( Monkey attack on Dog in beed ) आहे.

बीड - जिल्ह्यातील माजलगाव तालुक्यात लवूळ येथे मागील एक महिण्यापासून वानरांनी धुमाकूळ घातला आहे. ते गावात श्वानाचे पिल्लू दिसले की, त्यास उचलून घेऊन जात उंच ठिकाणावरून त्या पिलांना ढकलून देत त्यांचा बळी ( Monkey attack on Dog in beed ) घेत आहेत. या वानरांनी महिनाभरात सव्वाशेहून अधिक श्वानांच्या पिल्लांचा बळी घेतला असल्याचे लवूळ येथील ग्रामस्थांनी म्हटले आहे.

'पिलांना उंच झाडावरून देतात फेकून'

याबाबत सविस्तर माहिती अशी की, बीड जिल्ह्यातील माजलगावपासून 10 किलोमीटर अंतरावर लवूळ हे गाव आहे. या ठिकाणची लोकसंख्या पाच हजारांच्या घरात आहे. या ठिकाणी मागील दीड ते दोन महिन्यांपासून तीन वानरांचा वावर आहे. हे वानर मागील एक महिन्यापासून गावात असलेली श्वानाची पिल्ले उचलून घेऊन जात आहेत. ते या पिलांना उंच झाडावर किंवा घरावर घेऊन जाऊन त्या ठिकाणांवरून या पिलांना फेकून देत आहेत. उंचीवरून पडल्याने पिलांचा जागीच मृत्यू होत आहे. आतापर्यंत या वानरांनी सव्वाशेपेक्षा अधिक श्वानांच्या पिलांचा बळी घेतला असल्याचे गावकऱ्यांकडून सांगण्यात येत आहे.

एकाचा मोडला पाय -

लवूळ गावातील सिताराम नायबळ यांच्या श्वानाच्या पिल्लाला 15 दिवसांपूर्वी वानर घेऊन गेले होते. हे पिल्लू ओरडत असल्याने सिताराम नायबळ हे गच्चीवर जाऊन पिलाला सोडवण्याचा प्रयत्न करत असताना वानर त्यांच्या अंगावर धावून आले. नायबळ हे पळत असताना गच्ची वरून खाली पडले. त्यात त्यांचा पाय मोडला. त्यांच्यावर मागील पंधरा दिवसांपासून उपचार सुरू होते. याचबरोबर अनेक जण जखमी झाल्याच्या घटना देखील घडल्या आहेत.

गावाकऱ्यांनी सांगितले -

ग्रामपंचायतीने धारूर येथील वनविभागाच्या अधिकार्‍यांशी संपर्क केला असता ते केवळ एक दिवस आले व थोडावेळ त्या वानरास पकडण्याचा प्रयत्न केला. त्यांना ते वानर पकडता न आल्याने ते निघून गेले. साधारणत: दीड दोन महिन्यांपूर्वी याच वानराच्या पिलाला याच गावातील श्वानाने मारून टाकले होते. यामुळे वानर हे रागाच्या भरात गावातील श्वानाच्या पिलांना मारून टाकत असल्याचे या गावातील नागरिकांकडून सांगण्यात येत आहे.

प्राणी मित्राने सांगितले की,

याबाबत प्राणी मित्र सिद्धार्थ सोनवणे यांना या वानराच्या कृत्याबाबत विचारले असता ते म्हणाले की, 'वानराचे एक वैशिष्ट्य असते की, कुठलाही केसाळ प्राणी असला की, त्याला जवळ घेऊन त्यांच्या केसातील पिसवा, लिका वानरे खातात. याच अनुषंगाने ही वानरे श्वानाच्या पिल्लांना हातात घेऊन झाडावर अथवा गच्चीवर जातात व त्यांच्या अंगावरील पिसवा खातात व नंतर झाडावरून सोडून देतात. याचा परिणाम श्वानाचे पिल्लू झाडावरून खाली पडल्यामुळे मरते. वानरांच्या या कामात गावकऱ्यांनी अडथळा आणल्यास वानर माणसावर हल्ला देखील करत असतात, असे प्राणी मित्र सोनवणे म्हणाले.

हेही वाचा - Palghar Snake Skipping Video : पालघरमधील तरुणाने हातात साप पकडून मारल्या दोरी उड्या