बीड: गुप्तहेराच्या माहिती आधारे जिजामाता नगर येथे सुनील कदम यांच्या घरी गुटखा विक्रीसाठी मालाची साठवून केलेली आहे अशी माहिती पोलिसांना मिळाली होती. त्यानुसार त्यांनी आपल्या पथकासह शुक्रवारी रात्री 11.00 च्या सुमारास सुनील अश्रुबा कदम यांच्या राहत्या घरी छापा टाकला आणि त्या ठिकाणी तपासणी करत त्यामध्ये त्यांना 2 लाख 13 हजार 667 रुपयांचा गुटखा आढळला. हा सर्व मुद्देमाल ताब्यात घेतला असून आरोपी सुनील कदम याची चौकशी केली असता हा माल कुठून आला असे विचारले. यावेळी त्यांनी मैदा येथून बाळू घुंबरे यांच्या आखाड्यावरून श्रीधर रवींद्र ठोंबरे यांच्याकडून घेतला असल्याचे सांगितले.
यांच्याविरुद्ध गुन्हा दाखल : त्याच रात्री बाळू घुमरे यांच्या आखाड्यावर 2 वाजता जाऊन पोलिसांनी झाडाझडती घेतली. तर त्या ठिकाणी 34 लाख 7 हजार 600 रुपये किमतीचा गुटखा सापडला. माजलगावचे पोलीस उपनिरीक्षक भास्कर शंकरराव कांबळे यांनी दिलेल्या तक्रारीवरून आरोपी सुनील आश्रुबा कदम , श्रीधर रवींद्र ठोंबरे, बाळू उमरी यांच्यावर 328 188, 272, 273,34 भादंवी नुसार गुन्हा दाखल करण्यात आला आहे.
मुंबईतही गुटखा जप्त : रबाळे एमआयडीसी पोलिसांनी डिसेंबर, 2022 मध्ये गुटख्याचा ट्रक पकडत तब्बल 62 लाखांचा गुटका जप्त केला होता. या प्रकरणी एकास अटक करण्यात आली होती. तर चार जण फरार झाले होते. सागर गोहेल असे अटक करण्यात आलेल्या आरोपीचे नाव होते.
ट्रकचालक कारमध्ये बसून पळाला: रबाळे एमआयडीसी परिसरात गस्त घालत असताना एक संशयित ट्रक पोलिसांच्या पाहण्यात आला. ट्रकचालक व काही व्यक्तीचे बोलणे सुरू होते. या सर्व संशयास्पद हालचाली लक्षात आल्यावर ही बाब गस्त घालत असलेल्या पोलिसांनी वरिष्ठ पोलीस निरीक्षक सुधीर पाटील यांना कळवली. त्यांनी तत्काळ गुन्हे प्रगटीकरण विभागाचे पथक रवाना केले. दरम्यान पोलीस पथकाने सापळा रचल्याचे लक्षात येताच ट्रक चालक शौकत आणि इतर चार जण एका कारमध्ये बसून पळून गेले. तर ज्याने ट्रकमधील माल घेतला तो पोलिसांच्या हाती सापडला. त्याचे नाव सागर गोहेल असल्याचे समोर आले. त्याने पोलिसांना दिलेल्या माहितीनुसार ट्रक चालक शौकत याने माल दिल्याची माहिती दिली होती.
गुटखा जप्त: या ट्रकमध्ये पाहणी केली असता राज्यात प्रतिबंधित असलेला गुटखा असल्याचे निदर्शनास आले. तब्बल 61 लाख 36 हजार 132 रुपयांचा गुटखा जप्त करण्यात आला असून (जी.जे.01 जे टी 2570) या क्रमांकाचा ट्रक आणि आणखी एक वाहन देखील जप्त करण्यात आले होते. या ट्रकचा क्रमांक पाहता हा गुटखा गुजरातहून आला होता. मात्र कोणी पाठवला या मागे कोण आहे ? पळून गेलेल्या लोकांचा यात काय सहभाग आहे. याबाबत तपास सुरु आहे.
हेही वाचा : Bangladeshi Citizens Arrested In Thane : उल्हासनगरातून ४ बांगलादेशी नागरिकांना अटक
