बीड - उपमुख्यमंत्री अजित पवार हे शुक्रवारी बीड जिल्हाधिकारी कार्यालयातून बैठक आवरून उस्मानाबादकडे जात होते. यावेळी जिल्हाधिकारी कार्यालयासमोर बीड जिल्हा रुग्णालयातील कंत्राटी कामगारांनी अजित पवार यांचा ताफा अडवला. कोविडच्या काळात तात्पुरत्या स्वरूपात नर्स व वार्डबॉय घेतले होते. त्यांना पंधरा दिवसातच कोरोना कमी झाला असल्याचे कारण सांगून काढून टाकले आहे. यावरून कंत्राटी कामगार आक्रमक झाले होते. यादरम्यान पोलिसांनी काही कर्मचाऱ्यांना मारहाण देखील केली आहे.
यावेळी कंत्राटी कामगारांनी म्हटले आहे की, कोरोनाच्या काळात आम्ही मनातून रुग्णसेवा केलेली आहे. असे असताना देखील कोरोना कमी होताच 15 दिवसाच्या आत आम्हाला काढून टाकले आहे. आमच्यावर अन्याय झाला आहे. आमच्या मागण्या मान्य झाल्या नाही तर आमचे आंदोलन अजून आम्ही तीव्र करू, असा इशारा कंत्राटी कर्मचाऱ्यांनी दिला.
- बीड जिल्हा रुग्णालयातील कंत्राटी कामगार
बीड जिल्हाधिकारी कार्यालयातील बैठक आवरून उपमुख्यमंत्री अजित पवार गेटच्या बाहेर निघताच त्यांचा ताफा शासकीय विश्रामग्रहासमोर कंत्राटी कर्मचाऱ्यांनी अडवला. झालेली गर्दी हटवण्यासाठी पोलिसांनी देखील यावेळी कंत्राटी कामगारांवर सौम्य लाठीचार्ज केला. यावेळी कर्मचारी आक्रमक झाले होते.
- बीडचे आमदार संदीप क्षीरसागर यांची मध्यस्ती-
अजित पवार यांच्या ताफ्याला पोलिसांनी रस्ता करून दिल्यानंतर पवार हे उस्मानाबादकडे रवाना झाले. त्यानंतर तेथे बीडचे आमदार संदीप क्षीरसागर यांनी कंत्राटी कामगारांशी संवाद साधला व कंत्राटी कामगारांचा प्रश्‍न तत्काळ मार्गी लावण्यासंदर्भात त्यांनी कर्मचाऱ्यांना आश्वासन दिले.
