बीड - नशिबी अठराविश्व दारिद्र्य, मागच्या सात पिढ्या घरात कोणी शिकले-सवरलेले नाही. आयुष्य पालावर घालवलेली एक 38 वर्षाची महिला चक्क 17 व्या वेळी गरोदर आहे. ही धक्कादायक बाब माजलगाव तालुक्यात समोर आली आहे. 17 वेळा गर्भवती राहिलेल्या त्या महिलेला आरोग्य विभागाकडून कुटुंब नियोजनासंदर्भात मार्गदर्शन का झाले नाही? असा सवाल उपस्थित होऊ लागला आहे.
माजलगाव शहरातील केसपुरी कैम्प परिसरात पाल ठोकून राहणाऱ्या राजाभाऊ खरात यांच्या पत्नी लंकाबाई राजेभाऊ खरात यांच्या बाबतीत हे घडले आहे. खरात कुटूंब हे मुळचे टाकरवण येथील रहिवासी असून गावात रोजगाराचे साधन नसल्याने ते केसापुरी कॅम्प येथे पाल ठोकून राहतात. येथे राजेभाऊ खरात हे गीत गायन करतात तर, लंकाबाई या भंगार वेचण्याचे काम करुन पोट भरतात.
लंकाबाई यांची आत्ता पर्यंत सतरा बाळंतपण झाले आहेत.सद्या त्यांना 9 मुली आणि 2 मुले आहेत तर 5 मुलांचा जन्मानंतर विविध कारणांमुळे मृत्यू झाला. आता लंकाबाई 17 व्या वेळी पुन्हा गरोदर राहिल्या आहेत. यामुळे कुटुंब कल्याणच्या नावाने जनजागृती करणारे गेले कुठे हा खरा प्रश्न निर्मान होतं आहे. या प्रकारामुळे बीडच्या आरोग्य यंत्रणेला खडबडून जाग आली.
कुपोषित मुलासह ठोकली होती धूम
साधारण 2 वर्षापूर्वी लंकाबाई यांचा मुलगा कुपोषित असल्याचे समोर आले होते. त्याला जिल्हा रुग्णालयात दाखल करण्यात आले होते मात्र, कुणालाही कल्पना न देता त्यांनी धुम ठोकली होती. त्यानंतर 24 तासांनी लंकाबाईला पुन्हा शोधून आणत त्या कुपोषित मुलावर उपचार करण्यात आले होते. त्यावेळी आरोग्य विभागाची चांगलीच धावपळ झाली होती.
यापूर्वी तिचे समुपदेशन केलेले आहे
17 व्या वेळी गर्भवती असणाऱ्या महिलेचे समुपदेशन करून तिला ग्रामीण रुग्णालयात आणून सर्व तपासण्या करण्यात आल्या. त्यांची सोनोग्राफी केली असता 28 आठवड्यांचा गर्भ असल्याचे दिसले. स्त्री रोग तज्ज्ञांनी तपासणी करून पुढील उपचारासाठी जिल्हा रुग्णालयात जाण्याचा सल्ला दिला आहे. सध्या महिलेची प्रकृती ठणठणीत आहे असून गर्भावस्थेत असताना घ्यावयाची काळजी आणि प्रसुतीदरम्यानची गुंतागुंत व काळजीबाबत मार्गदर्शन केले आहे. असे जिल्हा शल्य चिकित्सक अशोक थोरात यांनी सांगितले.
