औरंगाबाद - अभ्यास न करण्यावरून मोठी बहीण रागवली म्हणून 8 व्या वर्गात शिकणाऱ्या मुलीने आत्महत्या केल्याची धक्कादायक घटना घडली आहे. शिल्पा रामकुमार धनगावकर (रा.सुदर्शननगर,एन-11 हडको) असे आत्महत्या करणाऱ्या मुलीचे नाव आहे. घराजवळील उद्यानातील विहिरीत उडी घेऊन तिने आत्महत्या केली आहे.
शाळेचा अभ्यास करत नसल्याने शिल्पाची मोठी बहीण तिच्यावर रागावली होती. त्यानंतर ती बुधवारी रात्री रागात घराबाहेर पडली. रात्रभर घरी न आल्याने नातेवाईकांनी गुरुवारी एन-7 सिडको पोलीस ठाण्यात शिल्पा बेपत्ता असल्याची तक्रार नोंदविली होती. आज(20 ऑगस्ट) सकाळी हडको एन-11 परिसरातील स्व.बाळासाहेब ठाकरे उद्यानात मॉर्निंगवॉकला गेलेल्या नागरिकांना उद्यानातील विहीरीत एक युवती तरंगताना दिसली.
हेही वाचा - VIDEO : पुराच्या पाण्यातून जाणे बेतले जिवावर, शेतकरी गेला वाहून
घटनेची माहिती मिळताच नातेवाईकांनी घटनास्थळी धाव घेत मृत शिल्पाची ओळख पटवली. त्यानंतर पोलिसांनी अग्निशमन दलाला पाचारण केले. अग्निशमन दलाच्या जवानांनी शिल्पाचा मृतदेह विहिरीबाहेर काढला. मृतदेह शवविच्छेदनासाठी घाटी रुग्णालयात हलवण्यात आले होते. या प्रकरणी सिडको पोलीस ठाण्यात अकस्मात मृत्यूची नोंद करण्यात आली आहे.
