अमरावती जिल्ह्यातील 'या' देवी मंदिरात होते नवकन्येचे पूजन, नवरात्रौत्सवात बेटी बचाओ बेटी पढाओचा संदेश

शारदीय नवरात्रोत्सवात माता पिंगळाईच्या दर्शनासाठी महाराष्ट्रासह मध्य प्रदेशातून भाविक पिंगळाई गडावर गर्दी करतात. या गडावर नवरात्रौत्सवानिमित्त देवीची स्थापना करून अखंड नंदादीप प्रज्वलित करून ९ दिवस आदिमायेची  मनोभावे पूजा केली जाते. यासोबतच बेटी बचाओ बेटी पढाओ चा संदेश देत या मंदिरात मुलींना देवी मानून येथे नवकन्येचे पुजनही केले जाते.

अमरावती - देशभरात सध्या नवरात्रोत्सवानिमित्त मोठ्या उत्साहाने देवीची आराधना करण्यात येत आहे. अमरावती जिल्ह्यातही नवरात्री उत्सवाची धूम पाहायला मिळत आहे. जिल्ह्यातील विविध प्राचीन देवी मंदिरांमध्ये मोठ्या आनंदात आणि उत्साहात हा सण साजरा करण्यात येत आहे. मोर्शी तालुक्यातील नेर पिंगळाई येथील गडावरही पिंगळाई देवीच्या दर्शनासाठी भाविक गर्दी करीत आहेत.

शारदीय नवरात्रोत्सवात विहिरीतून प्रगट होत भक्तांना दर्शन देणाऱ्या माता पिंगळाईच्या दर्शनासाठी महाराष्ट्रासह मध्य प्रदेशातून भाविक पिंगळाई गडावर गर्दी करतात. या गडावर नवरात्रौत्सवानिमित्त देवीची स्थापना करून अखंड नंदादीप प्रज्वलित करून ९ दिवस आदिमायेची मनोभावे पूजा केली जाते. यासोबतच बेटी बचाओ बेटी पढाओचा संदेश देत या मंदिरात मुलींना देवी मानून येथे नवकन्येचे पुजनही केले जाते.

हेही वाचा - रुख्मिणीच्या माहेरघरातील कुलस्वामिनी अंबिकादेवीला ११५१ अखंड ज्योतीचा संकल्प

मोर्शी-अमरावती राज्य महामार्गावर अमरावतीपासून ३५ किमी. अंतरावर असलेले गोराळा हे गाव आहे. तेथून दीड किमी. अंतरावर असलेल्या निसर्गरम्य टेकडीवर पिंगळाक्षी देवीचे मंदिर आहे. माहूरच्या रेणुका देवीचे प्रतिरूप असलेली ही देवी स्वयंभू मानली जाते. पिंगळाक्षी देवीचे मंदिर हे प्राचीन हेमाडपंथी शैलीत बांधलेले आहे. अंदाजे ५०० - ६०० वर्षांपूर्वी बांधलेले हे ऐतिहासिक मंदिर जागृत देवस्थान म्हणून ओळखले जाते.

हेही वाचा - बच्चू कडू यांनी रक्तदान करून दाखल केला उमेदवारी अर्ज

या मूर्तीचे वैशिष्ट्य म्हणजे मूर्तीचा चेहरा फक्त जमिनीवर असून उर्वरित शरीर जमिनीत आहे. या मूर्तीच्या खाली विहीर असून या विहिरीतून ही स्वयंभू मूर्ती निघाली असल्याची आख्यायिका आहे. देवीचा तेजस्वी चेहरा हा पूर्वाभिमुखी आहे. तेजस्वी डोळे, उंच कपाळावर मोठे कुमकुम तिलक आणि हिरवे वस्त्र परिधान केलेले देवीचे रूप बघून भक्तांच्या डोळ्याचे पारणे फिटते. मंदिराच्या गाभाऱ्यात विशिष्ट पद्धतीचे हेमाड चक्र आहे. ऐतिहासिक मंदिराची रचना आणि नवसाला पावणारी देवी म्हणून आख्यायिका असल्याने नवरात्रात येथे भाविकांची मोठी गर्दी असते.

या मंदिरात दिवसातून तीन वेळा देवीची पूजा केली जाते. ही पूजा देवीच्या वेगवेगळ्या रूपात होत असल्याचे मानले जाते. सकाळची पूजा बाल्यावस्थेतील रुपाची, दुपारची पूजा तारुण्य अवस्थेतल्या रूपातील, तर सायंकाळची पूजा ही वृद्ध अवस्थेतल्या रूपातील असते. नवसाला पावणारी देवी म्हणून पिंगलाक्षी देवी प्रसिद्ध आहे. आईप्रमाणे संकट काळात ती आपल्या पाठीशी उभी राहते, अशी दर्शनाला येणाऱ्या भक्तांची श्रद्धा आहे.

हेही वाचा - मुख्यमंत्र्यांनी बडनेऱ्यात सभा घेऊन माझ्या विरोधात बोलून दाखवावे - आमदार रवी राणा