छत्रपती संभाजीनगर : जुनी पेन्शन योजना लागू करा, या मागणीसाठी सरकारी कर्मचारी संपावर गेले आहेत. छत्रपती संभाजीनगर येथील शासकीय घाटी रुग्णालयातील 700 पेक्षा अधिक परिचारिकांनी संप पुकारला आहे. या संपामुळे रुग्णसेवेवर मोठा परिणाम होईल, अशी शक्यता वर्तवली जात आहे. जोपर्यंत सरकार आमच्या मागण्या पूर्ण करत नाही, तोपर्यंत हा संप असाच सुरू राहील, अशी माहिती परिचारिकांनी दिली आहे.
घाटी रुग्णालयात रुग्ण सेवेवर परिणाम : जिल्ह्यातील घाटी रुग्णालय हे गोरगरिबांवर उपचार करणारे, या विभागातील सर्वात मोठे रुग्णालय आहे. मराठवाड्यातील जिल्ह्यांसह परिसरातील नगर, जळगाव, बुलढाणा या भागातील रुग्ण मोठ्या प्रमाणात उपचारासाठी येत असतात. हजारो गोर गरीब रुग्णांवर रोज मोफत उपचार केले जातात. राज्य सरकारी कर्मचाऱ्यांनी बेमुदत संपावर जाण्याची घोषणा केल्यानंतर, परिचारिका संपात सहभागी झाल्या आहेत. त्यामुळे रुग्णसेवेवर मोठा परिणाम होण्याची शक्यता निर्माण झाली आहे. अत्यावश्यक सेवा मात्र सुरू ठेवण्यात आल्या असल्याचे घाटी प्रशासनाकडून सांगण्यात आले. काही शस्त्रक्रिया पुढे ढकलण्यात येतील, तर तातडीने गरजेच्या असलेल्या शस्त्रक्रिया केल्या जातील. त्यासाठी नियोजन करण्यात आले आहे. कोणत्याही रुग्णाला अत्यावश्यक सेवेपासून वंचित ठेवल्या जाणार नाही, याबाबत खबरदारी घेतल्याचं यावेळी संपकरी परिचारकांनी सांगितले.
सर्वच विभागातील सरकारी कर्मचारी संपावर : मराठवाड्यातील आठही जिल्ह्यांमधून सर्वच शासकीय विभागातील कर्मचाऱ्यांनी संपात सहभागी होण्याचा निर्णय घेतला. विभागात अंदाजे एक लाख दहा हजार कर्मचारी संपात सहभागी झाले आहेत. त्यामध्ये शिक्षक, शिक्षकेतर कर्मचारी यांचा समावेश आहे. सर्वच विभागात जिल्हाधिकारी कार्यालयासमोर सरकारी कर्मचारी निदर्शने करणार आहेत, त्याची सुरुवात सकाळपासूनच सुरू झाली आहे. त्यामुळे सरकारी शासकीय कार्यालयातील कामकाज ठप्प झाले आहे. अनेकांना या संपाबाबत माहिती नसल्याने शासकीय स्तरावर असणारे काम करण्यासाठी आलेल्या सर्व सामान्यांना याचा फटका बसला आहे. प्रमुख मागण्यांमध्ये जुनी पेन्शन योजना लागू करून जुनी रद्द करावी, कंत्राटी आणि योजना कामगार प्रदीर्घकाळ सेवेत असल्यामुळे सर्वांना समान वेतन द्यावे. रिक्त असलेली सर्व पदं तातडीने भरावी. अनुकंपा धारकांच्या राहिलेल्या नियुक्त्या मान्य कराव्या. मागासवर्गीय कर्मचाऱ्यांच्या पदोन्नत्या तात्काळ सुरू कराव्या, यासह इतर मागण्यांसाठी आंदोलन सुरू करण्यात आले आहे.
