औरंगाबाद - वंचित बहुजन आघाडीचे औरंगाबाद लोकसभा मतदारसंघाचे उमेदवार इम्तियाज जलील यांनी केलेली ५ तरी कामे दाखवावे, असे आव्हान शिवसेनेच्या वतीने करण्यात आले होते. या आव्हानाला आज (रविवारी) जलील यांनी पत्रकार परिषद घेत त्यांनी केलेली कामे जाहीरनाम्यातून प्रसिद्ध केली आहेत. तर त्यांनी शिवसेनेला हे माझे उत्तर असून आता खासदार चंद्रकांत खैरे यांनी त्यांची कामे दाखवावी, असे आव्हान केले आहे.
आमदार इम्तियाज जलील वंचित बहुजन आघाडीकडून लोकसभेचे उमेदवार आहेत. खासदार खैरे यांनी जिल्ह्याचा काहीच विकास केला नाही, अशी टीका जलील यांनी यापूर्वी केली आहे. या टीकेला औरंगाबाद पश्चिमचे शिवसेनेचे आमदार संजय शिरसाट यांनी प्रत्युत्तर देत, जलील यांनी त्यांच्या साडेचार वर्षाच्या कार्यकाळात ५ तरी कामे केली आहेत का? असा प्रश्न करत त्यांनी त्यांची ५ कामे दाखवावी. आम्ही १० कामे दाखवू, असे आव्हान केले होते.
शिवसेनेच्या या आव्हानाला प्रत्युत्तर म्हणून आज जलील यांनी अलंकार सभागृहामध्ये पत्रकार परिषदेचे आयोजन केले होते. या परिषदेमध्ये त्यांनी साडेचार वर्षात आमदार असताना केलेल्या कामांचा उल्लेख केला. तसेच जाहीरनामा प्रसिद्ध केला. हा जाहीरनामाच शिवसेनेच्या आव्हानाला आमचे उत्तर आहे. मी केलेले काम लिखित स्वरूपात जाहीरनाम्यात मांडले आहे. आता चंद्रकांत खैरे यांनी २० वर्षात केलेली कामे दाखवावी व लिखित स्वरूपात ते जाहीर करावे, असे प्रतिआव्हान जलील यांनी शिवसेनेला दिले आहे. त्यामुळे शिवसेना आता यावर काय भूमिका घेते हे पाहणे औत्सुक्याचे ठरणार आहे.
