औरंगाबाद - जिल्हा मध्यवर्ती सहकारी बँकेच्या निवडणुकीत बिगरशेती मतदारसंघातील पाच जागा निर्णायक ठरणार आहेत. निवडणूक निर्णय अधिकाऱ्यांनी रविवारी (दि.१४) उमेदवारांना चिन्हांचे वाटप केले. भुमरे, सत्तार, बागडे यांच्या पॅनलला कपबशी तर, डॉ. काळे, झांबड यांच्या काँग्रेस पॅनलला छत्रीचे चिन्ह देण्यात आले आहे. इतर अपक्ष उमेदवार विमान, छताचा पंखा, पतंग, मेणबत्ती या चिन्हांवर नशीब आजमावणार आहेत.
५० ते ६० मते घेणारे उमेदवार विजयी होण्याची शक्यता -
जिल्हा बँकेच्या संचालक मंडळाची निवडणूक येत्या २१ मार्चला तर, २२ मार्चला मतमोजणी होणार आहे. २२ जागांसाठी ४८ उमेदवार रिंगणात आहेत. बिगरशेती मतदारसंघात विद्यमान अध्यक्ष नितीन पाटील, आमदार हरिभाऊ बागडे, आमदार सतीश चव्हाण, आमदार अंबादास दानवे, अभिजित देशमुख यांचा सामना जगन्नाथ काळे, रवींद्र काळे, रंगनाथ काेलते, जे.के.जाधव आणि दिलीप बनकर यांच्याशी होणार आहे. या मतदारसंघात पाच जागा आणि ३३५ मतदार असल्याने किमान ५० ते ६० मते घेणारे उमेदवार विजयी होतील, असा अंदाज आहे.
औरंगाबाद तालुका सोसायटी मतदारसंघात जावेद पटेल आणि अंकुश शेळके, सोयगाव तालुक्यात रंगनाथ काळे आणि सुरेखा काळे, सिल्लोड मतदारसंघात अर्जुन गाढे आणि विष्णू जांभूळकर, फुलंब्री मतदारसंघात सुहास शिरसाट आणि पुंडलिक जंगले, कन्नड मतदारसंघात अशोक मगर आणि मनोज राठोड यांच्यात दुरंगी लढत होणार आहे.
हजारपेक्षा जास्त मतदान -
पैठण तालुका सोसायटी मतदारसंघातून रोजगार हमी योजना मंत्री संदीपान भुमरे व खुलताबाद तालुक्यातून किरण डोणगावकर हे यापूर्वीच बिनविरोध विजयी झाले आहेत. या तालुक्यातील मतदारांना आता महिला, ओबीसी, व्हीजेएनटी, एस-एसटी मतदारसंघासाठी मतदान करता येईल. मतदारांची संख्या पुढील प्रमाणे - औरंगाबाद तालुका - ७३, सोयगाव - ३६, सिल्लोड - ८४, खुलताबाद -२७, पैठण - ८६, कन्नड - १००, गंगापूर - ९९, वैजापूर - ११५, फुलंब्री - ६१, बिगरशेती मतदारसंघ - ३३५, कृषी पणन व शेतमाल प्रक्रिया - ४०.
