औरंगाबाद - कुटुंबातील महिलेचे डोहाळे जेवण ( Cow Dohale Program ) म्हणलं की समारंभ केला जातो. पिसादेवी भागात असाच समारंभ घेण्यात आला. ज्यामध्ये परिसरातील शंभरहून अधिक कुटुंबीय सहभागी झाले होते. जेवणाच्या पंगती उठल्या, या समारंभात महिलांचा उत्साह पाहण्यासारखा होता. हा सोहळा वेगळाच होता, करण डोहाळे जेवण होते ते सरदार कुटुंबियांच्या लाडक्या ( Kapila Cow Dohale ) कपिला गायीचे.
आठ दिवसांपासून केली होती तयारी -
पिसादेवी येथील दिशा निवारा भागातील संजय सरदार आणि कुटुंबियांची कपिला गाय आता आई होणार आहे. ही वार्ता मिळताच कुटुंबियांमध्ये आनंदाचे वातावरण पाहायला मिळाले. कपिला कुटुंबातील एक भाग असल्याने तिचे डोहाळे जेवण करण्याचा मानस सरदार कुटुंबीयांनी मित्र परिवरकडे व्यक्त केला. आणि डोहाळे जेवण करण्याचं नक्की झालं. त्यानंतर मंगळवारी रात्री डोहाळे जेवणाची वेळ निश्चित करण्यात आली. गेल्या आठ दिवसांपासून या सोहळ्याची तयारी करण्यात आली. मित्र परिवाराला निमंत्रण देणे, खरेदी करणे, मंडप घालून अशी लगबग आठ दिवस पाहायला मिळाली.
गायीचे विधिवत पूजन -
गाईचे डोहाळे जेवण ठरल्यानंतर त्याची जय्यत तयारी करण्यात आली. एका महिलेचे पूजन करतो, त्या पद्धतीने गायीचे पूजन करण्यात आले. परिसरातील महिलांनी गायीचे औक्षण केले आणि कौतुकही केले. सर्व महिला सजून-धजून आल्या होत्या जणू एखादा लग्न समारंभ चा सोहळा असेल. सरदार कुटुंबियांच्या मित्र परिवाराने तर कपिलासाठी भेटवस्तू देखील आणल्या होत्या. आपल्या कुटुंबातील भाग असलेल्या कपिलाचा एखाद्या महिलेसारखे डोहाळे जेवण करण्यात आले.
प्राण्यांचा आदर करण्यासाठी सोहळा -
गायीला आईचा दर्जा देण्यात आला. मात्र, आजही अनेक ठिकाणी गायीचा अवमान केला जातो. प्राण्यांची कत्तल केली जाते, त्यांची अवेहलना केली जाते. मात्र, प्राणी पृथ्वीचा भाग आहेत. मानवाप्रमाणे त्यांना देखील जगण्याचा अधिकार आहे. गाय कुटुंबातील भाग असून तिच्या विषयी प्रेम व्यक्त करण्यासाठी हा सोहळा साजरा केला. या निमित्ताने प्राण्यांवर प्रेम करा, असा संदेश देण्याचा प्रयत्न केल्याचं मत संजय सरदार यांनी सांगितलं.
मित्र मंडळी उत्साहात सहभागी -
सरदार कुटुंबातील कौशल्या, भाग्यश्री आणि सुषमा या महिलांच्या मैत्रिणींनी उत्साहात सहभाग घेतला. महिला मंडळाने मोठी तयारी केली. सर्वांनी हिरव्या साड्या परिधान केल्या इतकंच काय तर कपिला गायीला देखील हिरवी साडी देऊन ओटी भरण्यात आली. संजय सरदार, प्रकाश सरदार आणि रवी सरदार या भावंडांच्या मित्रांनी दिवसभर सुट्टी घेत कार्यक्रमाची जय्यत तयारी केली. डोहाळे जेवण कार्यक्रमात विधिवत पूजन झाल्यावर जवळपास तीनशे लोकांच्या जेवणाच्या पंगती उठल्या. आपल्या घरातील प्राण्याविषयी प्रेम पाहून परिसरात कपिलाचे डोहाळे जेवण सर्वत्र कौतुकाचा विषय ठरला आहे.
हेही वाचा -Chandrakant Patil Claim : किमान दहा मंत्र्यांना तरी राजीनामे द्यावे लागतील, चंद्रकांत पाटलांचा दावा
