अमरावती - पाणी टंचाईच्या मुद्द्यावर जिल्हा परिषदेत आज विशेष सभा आयोजित करण्यात आली होती. या सभेत स्वाभिमानी शेतकरी पक्षाचे सदस्य देवेंद्र भुयार यांनी वरूडचे गटविकास अधिकारी सुभाष बोबटे यांना रागाच्या भरात पाण्याची बाटली फेकून मारल्याने सभेत प्रचंड गोंधळ उडाला. या घटनेनंतर मुख्य कार्यकारी अधिकारी मनीषा खत्री यांच्यासह अधिकारी सभागृहातून निघून गेले.
देवेंद्र भुयार यांनी वरुड येथील पाणी प्रश्न उपस्थित केला. वरूड येथील पाणी टंचाई निवारणार्थ सभा घेतली नाही, असा आटोप देवेंद्र भुयार यांनी केला. या आरोपाचे खंडन करीत वरूडचे प्रभारी गटविकास अधिकारी सुभाष बोपटे यांनी बोलण्यास सुरुवात करताच देवेंद्र भुयार यांनी पाण्याच्या दोन बाटल्या सुभाष बोपटे यांना फेकून मारल्या. सुदैवाने एक बाटली हुकली आणि दुसरी बाटली मुख्य कार्यकारी अधिकाऱ्यांच्या सुरक्षा रक्षकाने अडविली.
या घटनेनंतर सभागृहात गोंधळ झाला. भाजपचे रवींद्र मुंदे, प्रवीण तायडे यांनी देवेंद्र भुयार यांच्या कृतीचा निषेध नोंदवला. यावेळी सभागृहात गोंधळ वाढल्याने मुख्य कार्यकारी अधिकारी मनीषा खत्री यांच्यासह सर्व अधिकारी सभागृहाबाहेर निघून गेले. या घटनेनंतर देवेंद्र भुयार यांना गुन्हे शाखेच्या पथकाने ताब्यात घेतले.
या वादाआधी गुरुदेवनगर येथील पाणी समस्येवर गौरी देशमुख यांनी प्रश्न उपस्थित केला होता. गौरी देशमुख यांनी पाण्याची घागर अध्यक्ष आणि मुख्य कार्यकारी अधिकाऱ्यांच्या समोर ठेवली. यावेळी अध्यक्ष नितीन गोंडाणे आणि गौरी देशमुख यांच्यातही वाद झाला.
