अमरावती - शहरासह संपूर्ण जिल्ह्यात कोरोनाबाधितांची संख्या वाढत आहे. सोमवारी नवीन पाच बाधितांची नोंद करण्यात आली. याबरोबरच जिल्ह्यातील एकूण बाधितांची संख्या 700 वर पोहोचली आहे. मागील 15 दिवसांपासून कोरोनाग्रस्तांची सरासरी संख्या दररोज 20 ने वाढत आहे. जिल्ह्यातील बाधितांची संख्या वाढत असतानाही कोरोनाला आटोक्यात आणण्यासाठी प्रशासन हवे तितके गंभीर असल्याचे दिसत नाही आहे. तर नागरिकही बिनधास्तपणे सर्रास नियमांचे उल्लंघन करत बाहेर गर्दी करत आहेत.
जिल्ह्यात कोरोनाचा पहिला रुग्ण 3 एप्रिलला आढळून आला होता. यानंतर तीन महिन्यात ही संख्या 700 वर पोहोचली. अमरावती शहरातील हतीपुरा, नागपुरी गेट, अलमस नगर, हबीब नगर, नूर नगर, छाया नगर, मासानगंज, बडनेरा, कंवरनगर, विलास नगर, महेंद्र कॉलनी, वडाळी, शेगाव नाका, रुक्मिणी नगर, साईनगर, आकोली, राहाटगाव, अंबागेट, जवाहर गेट, साबणपुरा, राजकमल चौक, गांधी चौक, राजापेठ, राठी नगर, दस्तुरनागर, यशोदानगर, फ्रेझरपुरा, अशोकनगर, पन्नालाल नगर, प्रभा कॉलनी, अंबा विहार, शारदा विहार, रामपूर कॅम्प, सिंधू नगर, शंकर नगर, तपोवन, राज्य राखीव पोलीस दल वसाहत, राहुल नगर, चपराशीपुरा अशा शहरातील जवळपास सर्वच भागात कोरोनाबाधित आढळले आहेत.
यापैकी बडनेरा, मसनगंज आणि अशोक नगर परिसर कोरोना हॉटस्पॉट म्हणून जाहीर करण्यात आले आहेत. अमरावती शहरासह भातकुली, अचलपूर, चांदुर रेल्वे, धामणगाव रेल्वे, मोर्शी, वरुड, तिवसा, चांदूरबाजार, अंजनगाव सुर्जी, दर्यापूर, नांदगाव खंडेश्वर, चिखलदरा आणि धरणी या सर्व 14 तालुक्यांतही कोरोनाचा शिरकाव झाला आहे. एप्रिल आणि मे महिन्यात कोरोनाची लागण होण्याचे प्रमाण कमी होते. लॉकडाऊन शिथिल केल्यानंतर शहर आणि जिल्ह्यात पूर्वीप्रमाणे रस्त्यावर आणि बाजार गर्दी वाढायला लागताच कोरोनाग्रस्तांची संख्या झपाट्याने वाढायला लागली.
कोरोनामुळे अमरावतीत 27 जणांचा मृत्यू झाला आहे. सद्यस्थितीत अक्टिव्ह पॉझिटिव्ह बाधितांची संख्या 203 इतकी आहे. जिल्ह्यातील बाधितांची संख्या वाढत असतानाही कोरोनाला आटोक्यात आणण्यासाठी प्रशासन हवे तितके गंभीर असल्याचे दिसत नाही आहे. तर नागरिकही बिनधास्तपणे सर्रास नियमांचे उल्लंघन करत बाहेर गर्दी करत आहेत.
सोमवारी आढळेले रुग्ण -
- परतवाडा येथील 21 वर्षीय पुरुष
- अमरावती शहरातील चपराशीपुरा भागातील 33 वर्षीय पुरुष
- रामपुरी कॅम्प परिसरातील 29 वर्षीय पुरुष आणि 55 वर्षीय महिला
- विदर्भ ज्ञान विज्ञान संस्थेलागत असणाऱ्या अमर नगर परिसरातील 58 वर्षीय पुरुष
