अमरावती - मध्यप्रदेशातील गुडी गावात रस्त्यावरील चरणाऱ्या दोन शेळ्या चोरून तिघेजण धारणी मार्गे परतवाडाकडे जात होते. या चोरांना धारणी पोलिसांनी आणि हरिसाल येथील नागरिकांनी चारचाकीसह पकडले. या कारवाईनंतर बकऱ्या चोरट्यांचे मोठे रॅकेट उघडकीस येण्याची दाट शक्यता आहे.
प्राप्त माहितीनुसार जिल्ह्यातील आरोपी सुरज आनंदराव हिवराळे, प्रदीप बाबुराव हिवराळे (ता. खामगांव, बुलडाणा), प्रमोद रामचंद्र निंबाळकर (रा. बाळापूर, ता. खामगाव, बुलडाणा) हे तिघे त्यांच्या चारचाकीने मध्य प्रदेशातील गुडी गावातून रस्त्यावर चालणार्‍या दोन शेळ्या कारमध्ये उचलून घातल्या आणि पळ काढला. पळून जात असताना शेखपुरा येथील कलीम मोहम्मद यांना आढळून आले. त्यांनी तत्काळ धारणी येथील पोलीस कर्मचारी सचिन होले यांना दूरध्वनीवरून या घटनेची माहिती दिली. कलीम मोहम्मद यांनी गुढी पासून आरोपींचा पाठलाग करत धारणीकडे आले. दरम्यान, आरोपीने भरधाव वेगाने देडतलाई येथील गेट पास करून धारणीपर्यंत पोहोचले तेथे पोलीस कर्मचाऱ्यांच्या मदतीने आरोपीला पकडण्याचा प्रयत्न केला. पण, आरोपीने त्यांच्या सुद्धा अंगावर गाडी घालून तेथून पळ काढला. तर धारणी शहरातून सुद्धा रस्त्यावर असलेल्या अनेक नागरिकांना कट मारून परतवाडा मार्गाकडे आपला प्रवास सुरू ठेवला. त्यावेळी पोलीस कर्मचाऱ्यांना हरिसाल गावाजवळ वनविभागाच्या गेटवर नाकाबंदी करून आरोपीला रोखण्याची माहिती दिली.
हेही वाचा - 'नव्या अविष्कारासह चांगली मुल्येही नव्या पिढीत रुजवणे गरजेचे'
आरोपी तेथे पोहचले. पण, गेट बंद असल्याने त्यांनी तेथून पुन्हा गाडी रिव्हर्स घेत हरिसाल गावाजवळच्या सिपना नदीच्या पुलाजवळ असलेल्या कच्च्या रस्त्याने पळ काढण्याचा प्रयत्न केला. पण, समोर कच्च्या रस्त्याने चारचाकी जात नसल्याने गाडी सोडून त्यांनी जंगलाच्या मार्गाने पळ काढला. त्यावेळी, हरिसाल येथील गावकऱ्यांनी त्यांचा मागोवा करून तिन्ही आरोपींना जंगलात पकडून पोलिसांच्या स्वाधीन केले.
हेही वाचा - शिवसेनेत बच्चू कडू विरुद्ध अब्दुल सत्तार, ...तो अधिकार सत्तारांना नाही
पोलीस, हरिसाल व धारणी येथील नागरिकांच्या मदतीने शेळ्या चोरणाऱ्या आरोपींना अटक करण्यात आली. आरोपींकडून यापूर्वीही शेळ्या चोरीचा प्रकार घडला असल्याची माहिती समोर येत असून त्या आरोपींकडून इतरही चोरीचे मोठे रॅकेट उघडकीस येण्याची दाट शक्यता वर्तविली जात आहे.
हेही वाचा - सिपना नदीचे खळखळणारे पाणी, निसर्गाच्या सौंदर्याची उधळण अन् कोलकास विश्रामगृह...
