महाराष्ट्र-मध्यप्रदेशच्या सिमेवर कडक बंदोबस्त; निगेटीव्ह अहवालानंतरच महाराष्ट्रात प्रवेश

कोव्हीड १९ चा प्रादुर्भाव रोखण्यासाठी महाराष्ट्र राज्याच्या सीमावर आता दुसऱ्या राज्यातील नागरिकांना अडविण्यात येत आहेत. अमरावती जिल्ह्यातील मेळघाट मधील भोकरबर्डी चेकपोस्टवर, मध्यप्रदेशातून येणाऱ्या गाड्याची तपासणी करण्यात येत आहे.

अमरावती - कोव्हीड १९ चा प्रादुर्भाव रोखण्यासाठी महाराष्ट्र राज्याच्या सीमावर आता दुसऱ्या राज्यातील नागरिकांना अडविण्यात येत आहेत. अमरावती जिल्ह्यातील मेळघाट मधील भोकरबर्डी चेकपोस्टवर, मध्यप्रदेशातून येणाऱ्या गाड्याची तपासणी करण्यात येत आहे. मध्यप्रदेशातून येणाऱ्या नागरिकांकडे कोरोना निगेटिव्ह रिपोर्ट असेल तरच त्यांना अमरावती जिल्ह्यात प्रवेश दिला जातो आहे. जर त्यांच्याकडे रिपोर्ट नसेल तर त्यांना आता परत पाठवलं जात आहे.

अमरावती जिल्ह्यातील महाराष्ट्र व मध्यप्रदेश बॉर्डरवर पोलिसांचा बंदोबस्त तैनात करण्यात आला आहे. यामध्ये वनविभाग, शिक्षन विभाग आरोग्य विभागाचे कर्मचारी तैनात करण्यात आले आहेत.

कोरोनाचा प्रसार रोखण्यासाठी मध्यप्रदेश राज्याने याआधीच चाचणी करणे बंधनकारक केले आहे. त्यामुळे जिल्ह्याधिकारी शैलेश नवाल यांनी देखील अमरावती जिल्ह्यात रविवारपासून दाखल होणाऱ्या नागरिकांसाठी कोरोना चाचणी गरजेची आहे, असे जाहीर केले आहे. मात्र अत्यावश्यक सेवा, मालवाहतूक, रूग्णवाहिकांसाठी यातून सूट असेल. शहरात विनामास्क विनाकारण फिरणाऱ्यांची फिरत्या पथकातर्फे दंडासोबतच ॲन्टीजेन चाचणी करण्यात येत आहे. त्यासोबतच जीवनावश्यक वस्तू सोडून सुरू असलेल्या इतर दुकाने आणि आस्थापनांवर कार्यवाही करण्यात येत आहे. आवश्यकता पडल्यास दुकानांवर प्रतिबंधात्मक कार्यवाही करण्यात येत आहे.

हेही वाचा- तन्मय माझा लांबचा नातेवाईक; पुतण्याच्या लसीकरणाच्या वादावर देवेंद्र फडणवीसांचे उत्तर