अमरावती - राज्यासह देशात प्रसिध्द असलेली जिल्ह्यातील चांदूर रेल्वे तालुक्यातील सावंगा विठोबा येथे गुढीपाडव्यानिमित्त भरणारी यात्रा प्रशासनाने कोरोनाचे विषाणूचे संभाव्य संकट पाहता रद्द केली आहे. याबाबतचे निर्देश चांदूर रेल्वेचे तहसीलदार राजेंद्र इंगळे यांनी तहसील कार्यालयात आयोजित केलेल्या बैठकत दिले.
जिल्ह्यातील चांदूर रेल्वे तालुक्यातील सर्वात मोठी यात्रा ही येत्या 24 आणि 25 मार्चला गुढीपाडवा निमित्ताने सांवगा विठोबा या गावात भरते. लाखोंच्या संख्येने भाविक अवधूत महाराजांच्या यात्रेला दर्शनासाठी विविध राज्यांतून येतात. यात सगळ्यात महत्त्वाचे म्हणजे 72 फुट उंच खांबांना खोळ चढविण्याचा चित्तथरारक कार्यक्रम लाखो भाविक 3 तासात सतत उभे राहून पाहतात. तसेच कापूर ज्योत लावतात. या दरम्यान लाखो रुपयांचे कापूर यात्रेत जाळले जातात. 400 वर्षांपासून सुरु असलेल्या परंपरागत यात्रेला कोरोना विषाणूमुळे दक्षतेच्या दृष्टीने प्रशासनाने बंदी घातली असून मंदिर व्यवस्थापकांना पत्र देण्यात आले आहे.
हेही वाचा - शेतीच्या वाटणीवरून वडिलांनी केलेल्या मारहाणीत मुलाचा मृत्यू
कोरोना विषाणूची लागण होवू नये म्हणून अमरावतीचे जिल्हाधिकारी शैलेश नवाल यांनी खबरदारी घेत चांदूर रेल्वे तालुक्यातील सांवगा विठोबा येथील अवधूत महाराजांची यात्रा रद्द करण्याचे आदेश दिले आहेत. कोरोना या संसर्गजन्य विषाणूची लागण होणार नाही या दृष्टिकोनातून ही यात्रा रद्द करण्यात येत असून तसे पत्र ही मंदिर विश्वस्तांना देण्यात आले आहे. सांवगा विठोबा यात्रेत मोठ्या संख्येने लोक उपस्थित राहतात अशा परिस्थितीत प्रशासनाने ही यात्रा रद्द केली आहे. याची भाविक भक्तांनी सुध्दा याची नोंद घ्यावी असे आवाहन तहसिलदार राजेंद्र इंगळे यांनी केले.
