अमरावती - कोकणात फिरायला गेलेल्या माजी नगरसेवकाचे घर फोडून 1 लाख 36 हजार रोखसह एकूण पावणे चार लाख रुपयांचा ऐवज चोरट्याने पळविला. राजापेठ पोलीस ठाण्याच्या हद्दीत येणाऱ्या शंकरनगर परिसरात ही घटना घटली.
काँग्रेसचे माजी नगरसेवक मुन्ना राठोड हे पत्नी आणि मुलासह कोकणात फिरायला गेले होते. मंगळवारी सकाळी ते अमरावतीला परत येत असताना शेजारी राहणाऱ्या भुसारी यांचा तुमच्या घराचे दार उघडे आहे, असा फोन आला. यानंतर मुन्ना राठोड यांनी लगेच त्यांच्या पुतण्याशी संपर्क साधून त्याला घरी पाठवले तसेच राजपेठ पोलीस ठाण्यालाही माहिती दिली.
चोरट्याने राठोड यांच्या घराच्या दाराचा कडीकोंडा तोडून आत प्रवेश केला. ज्या खोलीत कपाट आहे. त्या खोलीचे दार तोडून खोलीत प्रवेश केला. कपाटातील 1 लाख 36 हजार रोख, आयपॅड, दोन मोबाईल फोन, सोन्याचे कानातील दागिने, चांदीच्या तोरड्या यांसह सीसीटीव्ही कॅमेऱ्याचा डेटा, व्हिडिओ रेकॉर्डर आणि सेट-टॉप बॉक्सही चोरट्याने पळविला.
या प्रकरणाची पोलिसात तक्रार देण्यात आली आहे. माजी नगरसेवकाच्या घरात चोरी झाल्यामुळे शंकरनगर परिसरात एकच खळबळ उडाली आहे.
