अमरावती - तिवसा मतदार संघात येणाऱ्या मोर्शी तालुक्यातील नेर पिंगळाई गावात युवक काँग्रेसने भर चौकात मुलींचे अश्लील नृत्य आयोजित केले. कोल्हापूर आणि सांगलीमधील पूरग्रस्त कुटुबीयांना मदत देण्याच्या नावाखाली चक्क मुला-मुलींना नाचवल्यामुळे समाज माध्यमावर निषेध व्यक्त केला जात आहे. विशेष म्हणजे काँग्रेसच्या प्रदेश कार्याध्यक्ष तसेच तिवसा मतदार संघाच्या आमदार यशोमती ठाकूर यांचा फलक स्टेजवर लावण्यात आला होता.
मोर्शी तालुक्यातील नेर पिंगळाई गावात मोठ्या प्रमाणावर गणपती उत्सव साजरा केला जातो. यानिमीत्त बुधवारी विविध मंडळांनी विविध कार्यक्रम आयोजित केले होते. दरम्यान, गावातील शिवशक्ती गणेश मंडळाच्या मंचावरच मुलींच्या अश्लील नृत्याचा कार्यक्रम झाला. मात्र, या कार्यक्रमाशी आमचा कुठलाही सबंध नसून या कार्यक्रमाचा खर्च हा युवक काँग्रेसने केल्याचा शिवशक्ती गणेश मंडळाच्या पदाधिकाऱ्यांचे म्हणणे आहे.
हेही वाचा - बीडमध्ये फुटणार राष्ट्रवादीच्या प्रचाराचा नारळ, पक्ष पडझडीच्या काळात पवारच मैदानात
दरम्यान, मुला-मुलींच्या अश्लिल नृत्याचा कार्यक्रम आयोजित करणारे लोक, तिवसा मतदार संघाच्या आमदार यशोमती ठाकूर यांचेच कार्यकर्ते असल्याचे समोर आले आहे. काँग्रेस पदाधिकाऱ्यांनी आयोजित केलेल्या या कार्यक्रमावर सर्वस्तरांवरून टिका केली जात आहे.
त्या कार्यक्रमात मुली नसून किन्नर आहेत - आमदार यशोमती ठाकूर
आमदार यशोमती ठाकूर यांच्या सोबत या प्रकाराबाबत बातचीत केली असता त्यांनी त्या कार्यक्रमात मुली नसून किन्नर होते असे सांगितले आहे. तसेच गेले दोन ते तीन वर्षांपासून अशाचा प्रकारे किन्नर यांचा समावेश असलेला कार्यक्रम घेतला जाते, असेही त्या म्हणाल्या आहेत.
