अमरावती - अप्पर वर्धा धरणातून तिवसा मतदारसंघात सोमवारी सोडण्यात आलेले पाणी केवळ आमदार यशोमती ठाकूर यांच्या अट्टाहासाने वाया गेले असल्याचा आरोप आमदार डॉ. अनिल बोंडे यांनी केला आहे. जिल्हाधिकाऱ्यांचे आदेश दबावतंत्राचा वापर करून आमदार यशोमती ठाकूर यांनी प्रशासनास पाणी सोडण्यास भाग पाडले असल्याचेही आमदार डॉ. बोंडे म्हणाले.
जलसंपदा विभागात सोमवारी आमदार यशोमती ठाकूर यांनी मुख्य अभियंता रवींद्र लांडेकर यांच्याविरोधात घेतलेल्या भूमिकेचा आमदार डॉ. अनिल बोंडे यांनी निषेध नोंदवला. आज पत्रकार परिषद बोलावून आमदार अनिल बोंडे म्हणाले, अप्पर वर्धा धरणात तिवसासाठी 0.2 दशलाख घनमीटर पाणी आहे. इतके पाणी आज उन्हाळयाच्या दिवसात तिवसा पर्यंत पोहचू शकत नाही, हे ठाऊक असताना आमदार ठाकूर यांनी शिवीगाळ करित दबाव आणला. आमदार ठाकूर यांच्या दबावात येऊन पालकमंत्री आणि अधिकाऱ्यांनी अप्पर वर्ध्याचे पाणी सोडले. प्रत्यक्षात पाणी तीन किमीपर्यंत पोहचल्यावर त्याचे बाष्पीकरण झाले. यामुळे पाणी वाया गेले.
1 मे पर्यंत अप्पर वर्धा धरणात 101 दशलक्ष घनमीटर पाणी होते. परंतु आज 85 दशलक्ष घनमीटर पाणीसाठा आहे. त्यापैकी 5 दशलक्ष घनमीटर पाण्याचे बाष्पीकरण होणार आहे. उरलेल्या पाण्यातून अमरावती महापालिकेला ४६ दशलक्ष घनमीटर पाणी द्यायचे असून मोर्शी शहरासाठी 2 दशलक्ष घनमीटर पाणी, वरुडला 2.2 दशलक्ष घनमीटर, लोणीसाठी 0.283 दशलक्ष घनमीटर, हिवरखेडसाठी 03.दशलक्ष घनमीटर पाणी द्यायचे आहे, असे आमदार डॉ. बोंडे म्हणाले.
सोमवारी जलसंपदा विभागात आमदार यशोमती ठाकूर यांच्यासोबत एकही शेतकरी नव्हता तर ते सारे गुंड शिरले होते असा सनसनाटी आरोपही आमदार डॉ. अनिल बोंडे यांनी केला.
