अमरावती - राज्यात मागील एक महिन्यापासून कडक लॉकडाऊन आहे. यामध्ये फक्त जीवनावश्यक वस्तूंना सूट देण्यात आली आहे. मात्र कापड बाजारपेठ मागील महिन्यापासून बंद आहे. दरवर्षी उन्हाळ्यामध्ये या कापड बाजारपेठेत कोट्यवधीची उलाढाल होत असते मात्र लॉकडाऊनमुळे ही उलाढाल ठप्प झाली आहे. बाजारपेठ बंद असल्याने नेहमी ग्राहकांनी गजबजून दिसणाऱ्या या परिसरात शुकशुकाट पसरला आहे.
अमरावती येथील ड्रीमलैंड, सिटी लँड, ड्रीम लँड या तीनही मोठ्या कापड बाजार पेठा आहेत. या बाजारपेठांमध्ये संपूर्ण विदर्भातून छोटे-मोठे कापड व्यावसायिक हे खरेदीसाठी येतात. परंतु लॉकडाऊनमुळे या बाजारपेठे बंद असल्यामुळे येथे कोट्यवधी रुपयांचे नुकसान होत आहे.
कामगारांवर उपासमारीची वेळ-
विदर्भातील सर्वात मोठ्या कापड बाजारपेठेमध्ये हजारो कामगार काम करत असतात. परंतु दुकाने बंद असल्याने या कामगारांनाही काम नाही त्यामुळे हे कामगारही बेरोजगार झाले आहेत. आता या कामगारांच्या उदरनिर्वाहाचा प्रश्न निर्माण झाला असून त्यांच्यावर उपासमारीची वेळ आली आहे.
दुकाने सुरू करण्याची व्यापाऱ्यांची मागणी -
मागील काही दिवसांपासून हे तीनही मोठे कापड मार्केट बंद आहे. त्यामुळे कोट्यवधी रुपयांचे नुकसान होत असल्याने या बाजारपेठा सुरू करण्याची परवानगी देण्यात यावी. अशी मागणी येथील व्यापाऱ्यांनी जिल्हाधिकारी शैलेश नवाल यांच्याकडे केली आहे.
लग्न बस्त्यासाठी प्रसिद्ध बाजारपेठ -
अमरावती नजीक असलेल्या या तीनही मोठ्या बाजारपेठांमध्ये लग्नासाठी कपडे खरेदी करण्यासाठी लोकांची मोठी झुंबड असते. लग्नाच्या बस्त्यासाठी येथील दुकाने प्रसिद्ध आहेत, परंतु आता बाजारपेठा बंद असल्यामुळे लग्नासाठी कपडे खरेदी करणाऱ्या लोकांची तारांबळ उडाली आहे.
हेही वाचा - 'खतांच्या दरवाढीचा निर्णय मागे घ्या', शरद पवारांचे केंद्रीय मंत्र्यांना पत्र
