चांदूर रेल्वे शहरात हॉकर्सचे आंदोलन, बेमुदत फळ व भाजीपाला विक्री बंद

नगर परिषद समोर नॅशनल हॉकर्स फेडरेशन अमरावती जिल्हा, शाखा चांदूर रेल्वेकडून विविध मागण्यासाठी बेमुदत ठिय्या आंदोलन सुरू आहे. हॉकर्सचे साहित्य जप्त करणे, दंड वसूल करणे व प्रतिज्ञापत्र लिहून घेणे बंद करा, स्वनिधी योजनेचा लाभ सर्वच हॉकर्सला ताबडतोब देऊन कर्जपुरवठा करा आदींचा या विविध मागण्यात समावेश आहे.

अमरावती - चांदूर रेल्वे शहरातील फुटपाथ, टपरीधारक व फेरीवाल्यांच्या विविध मागण्यांसाठी​ 14 सप्टेंबरपासून प्रशासनाविरोधात चांदूर रेल्वे येथील नगर परिषद समोर नॅशनल हॉकर्स फेडरेशन अमरावती जिल्हा, शाखा चांदूर रेल्वे तर्फे बेमुदत ठिय्या आंदोलन सुरू आहे. परंतु 3 दिवस उलटूनही आंदोलनाची प्रशासनाने दखल न घेतल्याने आता हॉकर्स फेडरेशन आक्रमक झाली असून आज 17 सप्टेंबरपासून शहरात बेमुदत फळ व भाजीपाला विक्री बंद केली. यामुळे आज बाजारात सगळीकडे शुकशुकाट पाहावयास मिळाला. सर्वपित्री दर्श अमावस्येच्याच दिवशी फळ, भाजीपाला विक्री बंद केल्याने याचा त्रास नागरिकांना झाला.

मागण्यांमध्ये फुटपाथ, फेरीवाले यांच्याकरता कायद्यातील तरतुदीची अंमलबजावणी झाली पाहिजे, पोलीस व नगरपरिषद विभागाची कारवाई बंद करा, फुटपाथ व फेरीवाले यांचे सर्वेक्षण व नोंदणी करून प्रमाणपत्र तथा ओळखपत्र द्या, हॉकर्स झोन तयार करून विक्रीसाठी जागा द्या, व्यवसाय कर वसुलीच्या बदल्यात नागरी सुविधा द्या, हॉकर्सचे साहित्य जप्त करणे, दंड वसूल करणे व प्रतिज्ञापत्र लिहून घेणे बंद करा, स्वनिधी योजनेचा लाभ सर्वच हॉकर्सला ताबडतोब देऊन कर्जपुरवठा करा आदींचा समावेश आहे.