अमरावती - संत गाडगेबाबा अमरावती विद्यापीठाच्या व्यवस्थापन परिषदेवर राज्यपाल नामित सदस्य असणारे भाजपचे जिल्हाध्यक्ष प्रा. दिनेश सूर्यवंशी यांची हकालपट्टी करण्याची मागणी ४ जूनमध्ये झालेल्या सिनेटच्या बैठकीत करण्यात आली होती. असे असतानाही यावर अद्याप कुठलीच कारवाई झालेली नाही. याबाबत बुधवारी झालेल्या बैठकीत कुलगुरू डॉ. मुरलीधर चांदेकर यांना जाब विचारण्यात आला. तसेच राज्यपाल नामित सदस्य विद्यापीठाच्या विरोधात कट-कारस्थान कसा काय करू शकतो, असा प्रश्न या सभेत उपस्थित झाला.
बुधवारी सिनेटच्या बैठकीमध्ये प्राध्यापक प्राचार्य डॉ. संतोष ठाकरे यांनी गेल्या बैठकीत भाजपचे जिल्हाध्यक्ष असणारे आणि राज्यपालांनी विद्यापीठाच्या व्यवस्थापन समितीवर नामित केलेले सदस्य प्रा. दिनेश सूर्यवंशी तक्रार केली होती. त्यांची कृती कुलगुरू आणि विद्यापीठाची बदनामी करणारी असून अशा व्यक्तीची राज्यपालांकडे तक्रार करून त्यांना त्वरित विद्यापीठातून काढण्यात यावे अशी ही मागणी होती. तसेच त्यांना विद्यार्थ्यांसह शैक्षणिक धोरणाबाबत सर्व प्रश्न व्यवस्थापन समितीच्या बैठकीत उपस्थित करण्याचे आणि ते सोडविण्याचे सर्व अधिकार आहेत. मात्र, असे असताना विद्यापीठाच्या बाहेर पत्रकार परिषद घेऊन विद्यापीठावर मोर्चा काढू, तोडफोड करू, कुलगुरूंना पाहून घेऊ अशा स्वरूपाची भाषा वापरण्याचा प्रताप सूर्यवंशी यांनी केला आहे. अशा व्यक्तीवर कुलगुरूंनी कारवाई करायला हवी मात्र, कुलगुरूंनी या व्यक्तीची साधी तक्रारही राज्यपालांकडे केली नसल्याबाबत प्राचार्य ठाकरे यांनी सभागृहात खेद व्यक्त केला.
हेही वाचा - उपकुलसचिवांनी विद्यापीठाला लावला 39 हजारांचा चुना; कुलगुरुंनी दिले चौकशीचे आदेश
प्रा. सूर्यवंशी यांच्याबाबत सभागृहात मांडलेल्या विषयासंदर्भात प्राचार्य ठाकरे 'ईटीव्ही भारत'शी बोलत होते. प्रा. सूर्यवंशी हे आपले असल्यामुळे कुलगुरू त्यांच्याविरोधात कारवाई करत नसल्याबाबत त्यांनी खेद व्यक्त केला. डॉ. ठाकरे म्हणाले भाजपचे जिल्हाध्यक्ष असणाऱ्या सूर्यवंशी यांची काँग्रेसच्या माजी आमदारांसोबत विद्यमान आमदाराला पराभूत करण्यासाठी कारस्थान रचण्याबाबतची ऑडिओ क्लिप व्हायरल झाली होती. यात कोट्यवधी रुपयांचा भ्रष्टाचार कसा करायचा, याबाबत प्रा. सूर्यवंशी बोलत असल्याचे ऑडिओ क्लिपमध्ये स्पष्ट झाले होते. विशेष म्हणजे या व्यक्तीने हा माझाच आवाज असल्याचेही मान्य केले होते.
हेही वाचा - परीक्षा शुल्काच्या मागणीसह पीएचडी शुल्कवाढीच्या निषेधार्थ विद्यार्थी संघटना आक्रमक
भ्रष्टाचाराने बरबटलेल्या प्राध्यापक सूर्यवंशी सारख्या व्यक्तीला संत गाडगेबाबा अमरावती विद्यापीठाच्या व्यवस्थापन समितीवर राहण्याचा कुठलाही अधिकार नाही. या व्यक्तीने केवळ कुलगुरूंचा अवमान केला नसून विद्यापीठाची प्रतिष्ठाही धुळीस मिळविण्याचा उद्योग केला असल्याचा संताप प्राचार्य ठाकरे यांनी व्यक्त केला. कुलगुरूंनी प्रा. सूर्यवंशी विरूद्ध त्वरित राज्यपालांकडे तक्रार करून त्यांची हकालपट्टी करावी अशी मागणीही प्राचार्य ठाकरे यांनी केली आहे.
हेही वाचा - संविधान दिनानिमित्त 'युवा विकास मंच'च्यावतीने स्पर्धा परीक्षेचे आयोजन
