अमरावती - जन्मतःच दगावलेल्या बाळाचा मृतदेह स्मशानभूमीतून चोरीला गेल्याच्या संशयावरून मृतदेह ज्या ठिकाणी पुरला होता तेथे पुन्हा एकदा खड्डा खोदण्यात आला. खड्ड्यात बाळाचा मृतदेह आहे की नाही, याची खात्री करण्यात आली. हा प्रकार अमरावतीच्या हिंदू स्मशानभूमीत घडला.
येथील हिंदू समशनभूमीतून गुरुवारी एका बाळाचा जमिनीत पुरलेला मृतदेह चोरीला गेल्याचा संशय आला होता. दरम्यान शुक्रवारी नागपूर येथील श्याम नगर परिसरातील रहिवासी प्रफुल्ल ठाकरे यांच्या पत्नीला बाळ होताच ते दगावल्यावर बाळाचा मृतदेह शुक्रवारी हिंदू स्मशानभूमीत पुरविण्यात आला होता. प्रफुल्ल ठाकरे यांना आपल्या बाळाचा मृतदेह सुद्धा चोरीला गेला की काय? असा संशय आल्याने ते काही नातेवाईकांसह हिंदू स्मशानभूमीत पोहचले. यावेळी ज्या ठिकाणी बाळाचा मृतदेह पुरला होता, त्या खड्डयावरील माती उकरलेली दिसली. यामुळे आपले बाळही चोरीला गेले, याबाबत प्रफुल ठाकरे यांचा संशय बळावला. यानंतर त्यांनी नातेवाईकांसह राजपेठ पोलीस स्टेशन गाठून बाळ चोरीला गेल्याची तक्रार दिली.
पोलिसांनी प्रफुल ठाकरे आणि त्यांच्या नातेवाईकांसह स्मशानभूमीत पोहचले. बाळाचे मृतदेह पुरविण्यात आलेला खड्डा पाहून पोलिसांनाही बाळचा मृतदेह प्राण्याने काढून नेले असावे, असा संशय वाटला. यानंतर स्मशानभूमीतील मजुराकडून पोलिसांनी खड्ड्यातील माती उकरून काढली असता, बाळाचा मृतदेह खड्ड्यातच असल्याचे लक्षात आले.
