अमरावती - पेरणीयोग्य पाऊस झाल्यामुळे जिल्ह्यात बऱ्यापैकी शेतकऱ्यांनी आता पेरणी करण्यास सुरुवात केली आहे. अशातच धामणगाव रेल्वे मतदारसंघाचे काँग्रेसचे आमदार वीरेंद्र जगताप यांनी स्वत: ट्रॅक्टर चालवत आपल्या शेतात पेरणीला सुरूवात केली.
विधानसभेत जनतेचे प्रश्न मांडताना आपण आमदार पाहतो. कधी शेतकऱ्यांच्या प्रश्नसाठी चक्का जाम करणारे लोकप्रतिनिधी आपण पाहतो. तर कधी शेतकऱ्यांच्या समस्या जाणुन घेण्यासाठी थेट शेतकऱ्यांच्या बांधावर जाऊन चर्चा करणारे लोकप्रतिनिधी आपण पाहीले आहेत. पण अमरावती जिल्ह्यातील धामणगाव रेल्वे मतदारसंघाचे काँग्रेसचे आमदार विरेंद्र जगताप हे गेल्या अनेक वर्षांपासून स्वतः आपल्या शेतात पेरणी करतात. यावर्षी फरक एवढाच आहे की बैलजोडीने पेरणी करणारे आमदार आज मात्र ट्रॅक्टरने पेरणी करताना दिसले. शेतात चांगले पाणी मुरल्याने आमदार वीरेंद्र जगताप यांच्या टॅक्टर चालवीताना नाकी नऊ आले.