एसटी बस चालक-वाहकांना कोरोना लसीची प्रतीक्षा

गेल्या काही दिवसांपासून अमरावतीमध्ये पुन्हा कोरोना रूग्णांच्या संख्येत वाढ होताना दिसत आहे. एसटी चालक आणि वाहकांचा दररोज हजारो प्रवाशांशी संबंध येतो. मात्र, तरीही त्यांना अद्याप कोरोनाची लस दिली गेली नाही.

अमरावती - जिल्ह्यात दिवसेंदिवस कोरोनाचे रूग्ण वाढत आहेत. चालक आणि वाहकांचा एसटीने प्रवास करणाऱ्या हजारो प्रवाशांशी थेट संबंध येतो. त्यामुळे त्यांना कोरोनाची लागण होण्याचा सर्वाधिक धोका आहे. त्यांना प्राधान्याने कोरोनाची लस देणे गरजेचे आहे. मात्र, त्यांना अद्याप लस दिलेली नाही. सर्व एसटी कर्मचाऱ्यांना लवकरात लवकर लस द्यावी, अशी मागणी एसटी महामंडळातील कर्मचाऱ्यांनी केली आहे.

एसटी महामंडळला लॉकडाऊनमध्ये सर्वाधिक फटका बसला. दर महिन्याला होणाऱ्या वेतनात अनिश्चितता आली. त्यामुळे वेतनासह अनेक प्रश्न या कर्मचाऱ्यांसमोर आले आहेत. काही महिन्यांपूर्वी कोरोना काहीसा नियंत्रणात आल्यानंतर शासनाच्या आदेशानुसार टप्प्याटप्प्याने बससेवा सुरू झाली आहे. जिल्ह्यात सध्या 70 टक्के बसेस धावत आहेत. शहर आणि ग्रामीण भागात प्रवासी सेवा सुरू आहे. ग्रामीण भागात प्रवाशांकडून प्रतिसाद देखील मिळत आहे. आता कोरोनाने पुन्हा डोके वर काढले आहे. जिल्ह्यातील आठ आगारातून पाचशेपेक्षा अधिक बसेस सुरू असून दीड हजारावर चालक-वाहक सेवा देत आहेत. या कर्मचाऱ्यांना लस दिली जावी, अशी मागणी होत आहे.

वाहक-चालकांनी लक्ष द्यावे -

बसस्थानकावर गर्दी होत असल्याच्या व प्रवासी मास्क वापरत असल्याच्या तक्रारी येत आहेत. त्याबाबत जिल्हाधिका-यांनी एसटीचे विभागीय नियंत्रक श्रीकांत गभणे यांच्याशी चर्चा केली. मास्क नसलेल्या प्रवाशाला बसमध्ये प्रवेश देऊ नका. आवश्यक तिथे मार्शलची मदत घ्या. कोरोनाबाधितांची संख्या वाढत असताना बसस्थानकासारख्या ठिकाणी तर अधिक काटेकोरपणे कार्यवाही होणे गरजेचे आहे. त्यामुळे स्वत: लक्ष घालून वाहक-चालकांनी प्रवाशांना नियम पाळण्याच्या सूचना द्याव्यात, असे निर्देश जिल्हाधिका-यांनी दिले होते. त्यामुळे आपले नियमित काम सांभाळून चालक-वाहकांना प्रवाशांवर देखील लक्ष ठेवावे लागत आहे.

हेही वाचा - कोरोना अपडेट : गेल्या २४ तासांमध्ये देशात १ लाखांहून अधिक रुग्णांची नोंद; ४७८ बळी