अमरावती - आज होळीचा सण सर्वत्र साजरा केला जातो आहे, यात अमरावतीच्या खासदार नवनीत राणा व त्यांचे पती आमदार रवी राणा हे आदिवासी बांधवांसोबत होळी साजरी करण्यासाठी अमरावती जिल्ह्यातील मेळघाटात गेले असून खासदार नवनीत राणा व आमदार रवी राणा यांनी मेळघाटात आदिवासींसोबत होळी खेळण्याची आपली गेल्या 11 वर्षांपासूनची परंपरा जोपासली आहे.
आज मेळघाटातील गावात आदिवासी बालकांसोबत क्रिकेट खेळून खासदार नवनीत राणा यांनी मनसोक्त आनंद लुटला. मात्र, यावेळी राणा दाम्पत्याने कोरोना नियम धाब्यावर बसवले होते. दोघांनी तोंडाला मास्क बांधले नव्हते तर सुरक्षित अंतर यावेळी तीन तेरा वाजले होते. यावेळी नवनीत राणा यांच्या गोलंदाजीवर आमदार रवी राणा यांनी फलंदाजी केली. नवनीत राणा यांनी सुद्धा क्रिकेट पीचवर जोरदार फलंदाजी केली. राणा दाम्पत्याने यावेळी तुफान फलंदाजी करत क्रिकेटचा आनंद लुटला.
कार्यकर्तेसुद्धा सर्वविना मास्क दिसले
जिल्हात कोरोनाचा उद्रेक सुरू असताना राणा दाम्पत्याने सुरक्षित अंतराचे पार तीनतेरा बाजवले. दोघांच्या तोंडाला मास्क नव्हता, त्यामुळे कोरोना नियम राणा दाम्पत्याने पुन्हा धाब्यावर बसवले असल्याने हे नियम सर्वसामान्य माणसालाच आहेत का? हा प्रश्न पुन्हा यावेळी उपस्थित होत आहे. दरम्यान एकीकडे अमरावती जिल्ह्याच्या अनेक तालुक्यांमध्ये कोरोनाचा मोठा प्रादुर्भाव आहे. परंतु, मेळघाटमध्ये मात्र कोरोनाचा प्रादुर्भाव अल्प आहे, अशा परिस्थितीत आमदार रवी राणा व नवनीत राणा यांच्या सोबत गेलेले कार्यकर्तेसुद्धा सर्वविना मास्क दिसले. त्यामुळे मेळघाटात कोरोना पसरण्याची भीती व्यक्त केली जात आहे. कोरोना वाढला तर आरोग्य यंत्रणाही मेळघाटात सक्षम नाही आहे.
