अमरावती-'जागतिक महिला दिनाच्या पर्वावर अमरावतीकरांची मान पुन्हा एकदा अभिमानाने उंचावली आहे. अमरावतीच्या खासदार नवनीत राणा यांचा देशातील २५ श्रेष्ठ खासदारांमध्ये समावेश झाला आहे. एशिया पोष्ट व फेम इंडियाच्या सर्वेत संसदेतील कामगिरीच्या आधारे खासदार नवनीत रवी राणा यांनी हे पटकाविले स्थान आहे. हा गौरव माझा नसून मला निवडून देणाऱ्या तमाम मतदारांचा व माझ्या पाठीशी ठामपणे उभे राहणारे पती आमदार रवी राणा तसेच स्वाभिमानी शिलेदारांचा गौरव आहे, असे मत खासदार नवनीत राणा यांनी व्यक्त केले आहे.
एक सक्षम खासदार
अमरावती लोकसभा मतदारसंघाच्या खासदार नवनीत रवी राणा यांच्या खासदरकीला आता १८ महिन्यांचा कालावधी पूर्ण झाला आहे. परंतू पदार्पणातच त्यांनी आपल्या नेतृत्वगुणांची चुणूक दाखवत जिल्ह्यातील, राज्यातील व देशातील विविध प्रश्न व समस्या अभ्यासपूर्ण पद्धतीने सभागृहात मांडून सभागृहाचे लक्ष वेधून घेतले. खासदार नवनीत राणा यांच्या या आक्रमक पवित्र्याची सभागृहसोबत, विविध प्रसारमाध्यमे, सामाजिक माध्यमे यांनी दखल घेतली व अल्पावधीतच त्यांची ओळख एक सक्षम खासदार म्हणून संपूर्ण देशात निर्माण झाली.
देशातील पहिल्या २५ श्रेष्ठ खासदारांच्या यादीत नाव
महिला सक्षमीकरण, रोजगार निर्मिती व नाविन्यपूर्ण विकासाचा अजेंडा घेऊन त्या धडाक्याने कार्यरत आहे. मतदारांशी आत्मीयतेने सुसंवाद साधण्याची त्यांची हातोटी, मतदारांशी सहज सुलभ संपर्क या बाबीमुळे त्या लोकप्रिय आहेत. या सर्व बाबींची दखल घेऊन एशिया पोस्ट व फेम इंडिया यांनी केलेल्या सर्वेमध्ये जागतिक महिला दिनाच्या निमित्ताने देशातील पहिल्या २५ श्रेष्ठ खासदारांच्या यादीत त्यांना समाविष्ट करत हा बहुमान देण्यात आलेला आहे.
सर्व स्तरातून अभिनंदनाचा वर्षाव
दरम्यान हा गौरव आपला एकटीचा नसून मला निवडून देणाऱ्या तमाम मतदार बंधू भगिनींचा व आमदार रवी राणा यांच्या नेतृत्वात अविरतपणे काम करणाऱ्या युवा स्वाभिमानी शिलेदारांचा असल्याचे प्रतिपादन खासदार नवनीत रवी राणा यांनी केले आहे. सत्ता हे आपले साध्य नसून ते सेवेचे साधन आहे व भविष्यातही आपण आणखी जोमाने आपले हे समाजसेवेचे व्रत चालूच ठेवणार असल्याचे नवनीत राणा म्हणाल्या. या सन्मानाबद्दल समाजातील विविध मान्यवर, प्रतिष्ठित नागरिक, सामाजिक संघटना व नागरिकांनी खासदार नवनीत रवी राणा यांचे अभिनंदन केले आहे.
