अमरावती - पोलीस अटक करतील या भीतीने एका अट्टल चोरट्याने विष पिऊन चक्क पोलीस ठाणे गाठल्याची धक्कादायक घटना अमरावतीच्या दर्यापूर तालुक्यातील येवदा गावात घडली. अचानकपणे घडलेल्या या घटनेने पोलीस ठाण्यात कमालीचा गोंधळ उडाला होता. सध्या आरोपी श्रावन प्रल्हाद रायबोले याच्यावर अमरावतीच्या जिल्हा सामन्य रुग्णालयात उपचार सुरू आहेत.
आत्महत्येचा प्रयत्न करणारा आरोपी हा अट्टल चोर व खिसेकापू आहे. त्याच्यावर अनेक गुन्हे नोंद आहेत. दरम्यान, काही गुन्ह्याच्या चौकशीसाठी त्याला दोन दिवसांपूर्वीच पोलिसांनी पोलीस ठाण्यामध्ये बोलावले होते. अशातच मंगळवारी तो चौकशीसाठी पोलीस ठाण्यात दाखलसुद्धा झाला होता. तेव्हा त्याने आपण विष प्राशन केल्याचे पोलिसांना सांगितले. दरम्यान, अनपेक्षितपणे घडलेल्या प्रकाराने पोलिसांची चांगलीच तारांबळ उडाली.
आरोपीचे वडील ,भाऊ हे सुद्धा गुन्हेगारी प्रवृत्तीचे असल्याचे पोलिसानी सांगितले. सध्या आरोपीवर अमरावतीच्या जिल्हा सामान्य रुग्णालयात उपचार सुरू आहेत.
