अकोला - शिवसैनिकांमध्ये मटणाच्या फोडीवरून हाणामारी झाल्याची घटना जिल्ह्यातील बार्शीटाकळी येथे घडली. मूर्तिजापूरचे भाजपचे आमदार हरिष पिंपळे यांच्याविरोधात शिवसैनिकांनी मेळावा आयोजीत केला होता. या मेळाव्यादम्यान ही घटना घडली. काही वेळानंतर पदाधिकाऱ्यांनी कार्यकर्त्यांची समजूत काढून प्रकरण शांत केले.
बार्शीटकळी तालुक्यात शिवसेनेने मेळावा आयोजित केला होता. या मेळाव्यात मूर्तिजापूर मतदारसंघाचे आमदार हरीश पिंपळे यांच्या विरोधात एल्गार पुकारण्यात येऊन त्यांना विरोध करण्यात आला. दुसरा उमेदवार द्यावा, असा सूर पदाधिकारी आणि कार्यकर्त्यांमध्ये निघत होता. यावेळी जिल्हा प्रमुख नितीन देशमुख, जिल्हा परिषदेचे माजी सदस्य महादेवराव गवळे, माजी जिल्हा परिषदेचे सदस्य बंडू ढोरे यांच्यासह आदी पदाधिकाऱ्यांनी भाषण ठोकले.
कार्यक्रमानंतर जेवणाची मेजवानी होती. कार्यकर्त्यांसाठी जेवणासाठी मटण ठेवण्यात आले होते. याच मटणासाठी शिवसेना कार्यकर्त्यांमध्ये झुंबड उडाली. यादरम्यान ताटात असलेल्या मटणाच्या फोडीवरून शिवसैनिकांमध्ये वादंग झाले. याचे रुपांतर हाणामारीत झाले. शिवसेना जर एक मटणाच्या फोडीवर मत घेण्याचा प्रयत्न करत असल्याचे यावरून दिसते. तर शिवसेनेची मूर्तिजापूर मतदारसंघात काय किंमत आहे, हे यावरून दिसते. शिवसेना अशा प्रकारे मत मागत असेल आणि भाजपचे विद्यमान आमदार पिंपळे यांच्या विरोधात शिवसेनेचे हे षडयंत्र असल्याचे स्पष्ट होते.
