अकोला - ग्रामसेवक संघटनेचे राज्यभरातील आंदोलन सध्या स्थगित झाले असले, तरीही जिल्हा परिषदेच्या ग्रामसेवक संघटनेचे असहकार आंदोलन सुरुच राहणार असल्याची माहिती जिल्हाध्यक्ष रविबाबू काटे यांनी पत्रकार परिषदेत दिली. जिल्हा परिषदेचे मुख्य कार्यकारी अधिकारी आयुष प्रसाद यांनी 322 ग्रामसेवकांना कार्यमुक्त केल्यामुळे ग्रामसेवकांमध्ये असंतोष आहे.
जुनी पेन्शन योजना सुरू करण्यासह कंत्राटी ग्रामसेवकांची पदे भरण्यात येऊ नये, अशी प्रमुख मागणी या संघटनेतर्फे करण्यात आली होती. तसेच सध्याच्या कंत्राटी कर्मचाऱ्यांना कायम करण्या सोबतच ग्राम विकास अधिकाऱ्या ऐवजी पंचायत विकास अधिकारी, असे या पदाचे नामकरण करावे. या मागण्यांसाठी ग्रामसेवकांनी राज्यभरात आंदोलन पुकारले होते. यामुळे राज्य सरकारने ग्रामसेवकांना कार्यमुक्त करण्याचे आदेश दिले होते.
हेही वाचा ग्रामसेवकांच्या दप्तर कुलूपबंद आंदोलनामुळे शेतीचे पंचनामे रखडले
संबंधित आदेशानुसार जिल्हा परिषदेचे मुख्य कार्यकारी अधिकारी आयुष प्रसाद यांनी 322 ग्रामसेवकांना कार्यमुक्त केले. यानंतर आयुष प्रसाद यांना शासकीय कामात असहकार्य दर्शवण्याचा पवित्रा या संघटनेमार्फत घेण्यात आला होता. तसेच कोणतेही प्रशिक्षण अथवा बैठकीत ग्रामसेवक उपस्थित राहणार नसल्याचेही सांगण्यात आले. सध्या संघटनेतर्फे पुकारण्यात आलेले असहकार आंदोलन सुरूच राहणार असल्याचे संघटनेच्या अध्यक्षांनी सांगितले आहे.
हेही वाचा ग्रामसेवकांचे असहकार आंदोलन; जिल्हा परिषदेसमोर दिले धरणे
संबंधित पत्रकार परिषदेला राज्याचे सहसचिव शेख चांद कुरेशी, तालुकाध्यक्ष सुधाकर खंडारे, गणेश निमकर्डे, महेंद्र बोचरे, जनार्धन मुसळे हे उपस्थित होते.
