अहमदनगर - नगर-पुणे महामार्गावर जातेगाव फाट्यावर ट्रक आणि मिनी बसचा अपघात होऊन 2 जण ठार, तर 15 जण जखमी झाले आहेत. यामध्ये तीन जणांची प्रकृती गंभीर आहे. जखमींना तातडीने सुपा, शिरूर येथील खासगी आणि काहींना नगरच्या जिल्हा रुग्णालयात भरती करण्यात आले आहे.
मृत आणि जखमी एकाच कुटुंबातील नातेवाईक आहेत. या अपघातामुळे नगर-पुणे महामार्गावर वाहतुकीची कोडी झाली होती. लक्ष्मी वसंत दोमल (वय-65 रा. सातभाई गल्ली, तोफखाना, नगर), विश्वनाथ बाळराम धीमन (वय-50, रा. लोणार गल्ली, नगर) अशी मृत व्यक्तींची नावे आहेत. बस मधील इतर पंधराजण जखमी आहेत. हे सर्व नातेवाईक आळंदी (जि-पुणे) इथे एका दशक्रिया विधी कार्यक्रमासाठी गेले होते. कार्यक्रम आटोपून नगरकडे परतत होते.
हेही वाचा - वाढते अपघात कमी करणे हा वाहतुकीचे नियम कठोर करण्याचा उद्देश
रात्री साडेआठच्या सुमारास जातेगाव फाट्याजवळ नगरहून पुण्याकडे जाणाऱ्या एका ट्रकचा पुढचा टायर अचानक फुटून ट्रक डीवायडर तोडून नगरकडे येणाऱ्या मिनी बसवर धडकली. या धडकेत बस मधील दोन प्रवासी जाग्यावरच मृत पावले, तर इतर सर्व पंधराजण जखमी झाले. घटनेनंतर सुपा पोलिसांनी धाव घेत मदतकार्य केले. या प्रकरणी सुपा पोलीस ठाण्यात गुन्हा दाखल करण्यात आला आहे. अपघातानंतर नगर-पुणे मार्गावरील वाहतूक बराच काळ खोळंबली होती.
हेही वाचा - अमरावतीत ओव्हरटेक करण्याच्या प्रयत्नात ट्रकची दुचाकीला धडक; दोन गंभीर जखमी
