अहमदनगर - नगर शहरातील माळीवाडा स्टॅण्ड जवळील छत्रपती शिवाजी महाराज चौकात रविवारी छत्रपती शिवरायांचे स्मारक एका नव्या आकर्षक नेत्रदीपक रुपात पहावयास मिळाले. (Shivteerth Lokarpan Ceremony) रुपडे पालटलेल्या या सुंदर स्मारकाचे अनावरण शहराचे आमदार संग्राम जगताप यांच्या हस्ते करण्यात आले.
शिवप्रेमींनी केली मोठी गर्दी-
सायंकाळी पाच वाजेपासून या भव्यदिव्य सोहळ्यास प्रारंभ झाला. विविध शिवप्रेमी संघटनांनी एकत्रित येत 'अखंड हिंदू समाज, नगर' यांच्यावतीने या सोहळ्याचे आयोजन करण्यात आले होते. रविवारी सायंकाळी छत्रपती शिवाजी महाराज चौकाकडे शिवप्रेमी तरुणाईचे लोंढे सर्व रस्त्यांवरून दिसून येत होते. (MLA Sangram Jagtap) प्रत्येकाची पाऊले ही छत्रपती शिवाजी महाराज चौकाकडे पडत होती तर डोळे महाराजांची नव्या रुपातले स्मराक पाहण्यासाठी उत्सुकतेने आसुसलेली होती. संग्राम यांच्या हस्ते औपचारिक अनावरण, पारंपरिक पद्धतीने यावेळी अभिषेक आदी कार्यक्रम झाल्यानंतर आकर्षक डिजिटल रंगसंगतीची उधळण करत डीजेवर छत्रपती शिवाजी महाराजांवर पोवाडे, गाणी आणि संगीत वाजायला लागल्या नंतर शिवप्रेमींनी ठेका धरला.
1955 साली झाली होती पुतळ्याची उभारणी-
नगरच्या माळीवाडा एसटी स्टॅण्ड समोर असलेल्या चौकात 1955 साली पंचधातुची छत्रपती शिवाजी महाराजांच्या अश्वारूढ पुतळ्याची स्थापना करण्यात आली होती. दरवर्षी शिवजयंती निमित्ताने मूर्तीला ऑईलपेंट दिला जात होता. स्मारकावरील ऑईलपेंट अनेकवर्षे साचल्याने त्याचे थरवाढत जाऊन त्याच्या खपल्या पडायला लागल्या होत्या.
संग्राम जगताप यांचा पुढाकार-
ही बाब शिवप्रेमींनी महानगरपालिका आयुक्तांना लक्षात आणून देत याच मूर्तीला नव्याने व्यवस्थित रूप देण्यासाठी विनंती केली होती, प्राप्त माहिती नुसार ही परवानगी नाकारली गेली. मात्र, शिवप्रेमींनी नाउमेद न होता शहराच्या लोकप्रतिनिधीं संग्राम जगताप यांना यात लक्ष घालण्याचे आवाहन केले होते. या आवाहनाला यश येत पुढील कार्यवाही सुरळीत पार पडून महानगरपालिका आयुक्तांनी परवानगी, निधीची व्यवस्था मंजूर केली होती.
शिल्पकार कांबळे यांनी केले स्मारकाचे काम-
गेल्या पंधरा दिवसांमध्ये स्मारकाचे नाविन्यपूर्ण काम पूर्णत्वास आले. जागेवरच स्मारकाला आडोसा करून काम सुरू करण्यात आले होते. अमेरिकेत शिल्पकलेचे विशेष प्रशिक्षण घेतलेले नगरचे प्रसिध्द शिल्पकार विकास कांबळे यांनी आता आहे त्याच स्मारकावर काम करत स्मारकाला आकर्षक नावीन्य दिले आहे. यासाठी त्यांनी अमेरिकन पॉलिस वापरले आहे. आत हे स्मारक अगदी नव्या रुपात झळाळी असलेली दिसत आहे.
छत्रपती संभाजी, डॉ. आंबेडकर यांचेही लवकरच पूर्णाकृती स्मारक-
रविवारी हा भव्य शिवतीर्थ सोहळा अनेक मान्यवरांच्या उपस्थितीत संपन्न झाला. महापौर शेंडगे यावेळी उपस्थित होत्या. यावेळी बोलताना संग्राम जगताप यांनी लवकरच शासकीय मंजुरी घेऊन शहरात छत्रपती संभाजी महाराज आणि घटनाकार भारतरत्न डॉ. बाबासाहेब आंबेडकर यांचे पूर्णाकृती स्मारक बसवण्यात येईल. तसेच, छत्रपती शिवाजी महाराजांच्या स्मराकाची उंची वाढवण्यासाठी शासनाकडे परवानगी घेतली जाईल असेही सांगितले.
कार्यक्रम महानगरपालिकेचा की राष्ट्रवादीचा
कार्यक्रमानंतर राजकीय चर्चेला समाजमाध्यमात सुरुवात झाली आहे. महानगरपालिका निधीतून आयुक्तांच्या परवानगीने हे स्मारकाचे काम करण्यात आले. मात्र, संपूर्ण कार्यक्रमावर छाप राष्ट्रवादी कॉंग्रेसचे संग्राम जगताप यांची का? असा प्रश्न चर्चेत येत आहे. मनपात सत्तेत असलेल्या शिवसेनेकडून काहींनी हा प्रश्न समाजमाध्यमात उपस्थित केल्याचे दिसून येत आहे.
हेही वाचा - लग्न जमवून जाताना झाला अपघात; तिघांचा मृत्यू तर एक गंभीर जखमी
