अहमदनगर - राज्यातील पूरग्रस्तांच्या मदतीसाठी शिर्डीतील साईबाबा संस्थान विश्‍वस्‍त व्‍यवस्‍थेच्यावतीने १० कोटी रुपयांचा निधी देण्यात येणार असल्‍याची माहिती संस्थानचे अध्यक्ष डॉ. सुरेश हावरे यांनी दिली.
यासंदर्भात बोलताना ते म्हणाले, राज्‍यामध्‍ये मुसळधार पावसामुळे भीषण पूरपरिस्थिती निर्माण झालेली आहे. या जलप्रलयाच्‍या थैमानामुळे विशेषत: पश्चिम महाराष्‍ट्रातील कोल्‍हापूर, सांगली, सातारा या जिल्‍ह्यातील जनजीवन विस्कळीत झाले असून परिस्थिती अतिशय बिकट बनली आहे. यामुळे हजारो नागरिक बेघर झाले आहेत. तसेच अनेक गावेही उद्ध्‍वस्‍त झाली आहेत.
ही एक भीषण नैसर्गिक आपत्‍ती आहे. त्यामुळे आपले राष्‍ट्रीय कर्तव्‍य समजून या पूरग्रस्‍तांसाठी १० कोटी रुपयांचा निधी देण्‍याचा निर्णय श्री साईबाबा संस्थान विश्‍वस्‍त व्‍यवस्‍था, शिर्डीच्‍यावतीने घेण्‍यात आलेला आहे. सदरचा निधी न्‍यायालयीन प्रक्रियेस अधीन राहून मुख्‍यमंत्री सहाय्यता निधीस देण्यात येणार आहे. संस्‍थानच्‍यावतीने परिस्थिती बघून वैद्यकीय पथक व औषधेही पाठविण्यात येणार असल्याचेही त्यांनी यावेळी सांगितले.
राज्‍य सरकार पूरग्रस्तांच्या मदतीसाठी अहोरात्र परिश्रम घेत आहे. राज्‍यात आलेली ही आपत्‍ती मोठी असून या आपत्‍तीतून बाहेर पडण्‍यासाठी श्री साईबाबांच्‍या चरणी प्रार्थना करत असल्‍याचे डॉ. हावरे यांनी यावेळी सांगितले.
