शिर्डी : शिर्डी शहराचा कायापालट करणाऱ्या सौंदर्यकरणाच्या पहिल्या टप्प्यातील 52 कोटींच्या कामांचा प्रस्तावित विकास आराखडा राज्याचे महसूल मंत्री तथा जिल्ह्याचे पालकमंत्री राधाकृष्ण विखे पाटील यांनी आज साईबाबा चरणी अर्पण केला. शिर्डी शहर व परिसराबद्दल देशभरातील भाविकांमध्ये आत्मीयता वृध्दींगत व्हावी, यासाठी शिर्डीचा येत्या काळात अंर्तबाह्य कायापालट करण्यात येणार आहे. 'विकासशील शिर्डी, सुंदर शिर्डी, आनंददायी शिर्डी' अशी शिर्डीची प्रतिमा होईल, यावर भर राहणार असल्याचा विश्वास पालकमंत्री विखे पाटील यांनी यावेळी व्यक्त केला.
आराखड्याचे सादरीकरण केले : राधाकृष्ण विखे पाटील यांनी आज साईबाबा समाधी मंदिराचे दर्शन घेत शिर्डी सौंदर्यकरणाच्या आराखड्याची प्रत साईचरणी अर्पण केली. शिर्डी संस्थान सभागृहात वास्तूविशारद तज्ज्ञ अजय कुलकर्णी यांनी या सौंदर्यकरण आराखड्याचे चित्रफितीच्या माध्यमातून सादरीकरण केले. त्यानंतर महसूलमंत्र्यांनी पत्रकारांशी संवाद साधला. या प्रसंगी शिर्डीचे खासदार सदाशिवराव लोखंडे, शिर्डी संस्थानचे मुख्य कार्यकारी अधिकारी पी. सिवाशंकर, उपमुख्य कार्यकारी अधिकारी राहुल जाधव, उपविभागीय अधिकारी माणिक आहेर, नगरपरिषदेचे मुख्याधिकारी काकासाहेब डोईफोडे, राहाता तालुक्याचे तहसीलदार अमोर मोरे तसेच शिर्डीतील ग्रामस्थ मोठ्या संख्येने उपस्थित होते.
शिर्डीसाठी 52 कोटींचा विशेष निधी मंजूर : शिर्डी शहर, मंदिर परिसर आणि परिक्रमा मार्गाचे सुशोभीकरण करून ठिकठिकाणी सौंदर्यस्थळे विकसित व्हावीत यासाठी राज्यशासनाकडून शिर्डीसाठी 52 कोटींचा विशेष निधी मंजूर झाला आहे. या निधीच्या माध्यमातून पहिल्या टप्प्यात मंदिरासमोरील पादचारी मार्ग, शहरातील मुख्य प्रवेश मार्ग, मुख्य चौक, मंदिर आवारातील पादचारी मार्ग आणि शिर्डी परिक्रमेच्या 14 किलोमीटर मार्गाच्या सौंदर्यीकरणाचे सुनियोजन करण्यात आले आहे. पहिल्या टप्प्यातील कामांना तीन महिन्यात सुरूवात होईल. सुशोभीकरण करताना ग्रामस्थांच्या सूचनांचाही गांभीर्याने विचार करण्यात येईल.
12 विमाने थांबतील असे नवे टर्मिनल उभारणार : दुसऱ्या टप्प्यात शिर्डी गावाच्या मूळ ढाच्याला कोठेही धक्का लागू न देता शिर्डी शहराचा अंर्तबाह्य चेहरामोहरा बदलण्यासाठी शासन प्रयत्न करणार आहे. नगरविकास विभागाच्या माध्यमातून 50 कोटी रूपये खर्चून साईबाबांच्या जीवनाची माहिती देणारा 'थीम पॉर्क' उभारण्यात येणार आहे. शेती महामंडळाच्या जागेवर अपर जिल्हाधिकारी कार्यालयाच्या इमारतीसाठी 70 कोटी रूपये मंजूर करण्यात आले आहेत. शिर्डी विमानतळावर एकाच वेळेस 12 विमाने थांबतील असे नवीन टर्मिनल इमारतीसाठी 600 कोटी मंजूर झाले आहेत. लवकरच त्याचे काम सुरू होणार आहे. शेती महामंडळाच्या जागेवर 'लॉजिस्टिक पार्क' आणि 'इंटरनॅशनल कन्व्हेन्शन सेंटर' उभारण्याचा शासनाचा मानस असल्याचेही विखे पाटील यांनी यावेळी सांगितले.
सुशोभीकरणाचा प्रस्तावित आराखडा : शहर नियोजक तथा वास्तूविशारद तज्ज्ञ अजय कुलकर्णी यांनी शिर्डी सौंदर्यीकरणांचा आराखडा तयार केला आहे. शिर्डी साईबाबा मंदिर परिसरातील पादचारी मार्ग, परिक्रमेचा 14 किलोमीटर मार्ग, 5 एकर परिसरात साई वृंदावन पार्क विकसित करणे, दांडीच्या धर्तीवर पर्यावरणपूरक सोलर बगीचा, शहरातील प्रवेश मार्गातील चौकांमध्ये तसेच शहरातील मुख्य चौकात सौंदर्यस्थळे विकसित करणे, परिक्रमा मार्गावर त्रिकोणी खांबावर कोरीव साईचरित्र आदी विशेष कामे पहिल्या टप्प्यातील आराखड्यात प्रस्तावित करण्यात आले आहेत. या सुशोभीकरणाच्या कामांसाठी स्थानिक स्तरावर तयार करण्यात आलेले फर्निचर, दगड आणि विटांचा वापर करण्यात येणार आहे.
