अहमदनगर - पालकमंत्री प्राध्यापक राम शिंदे यांच्या जामखेड मतदारसंघातील मोहा गावानजीक तब्बल ७ कला केंद्रांना जिल्हा प्रशासनाने परवानगी दिली आहे. यामुळे स्थानिक ग्रामस्थ चांगलेच संतापले आहेत. त्यांनी शनिवारपासून प्रशासनाच्या विरोधात बेमुदत उपोषणाला सुरुवात केली आहे.
यापूर्वीही गावकऱ्यांनीकला केंद्राविरोधात विविध आंदोलने आणि ग्रामसभेत ठराव घेत ३ महिन्यांपूर्वी ही केंद्रे बंद पाडली होती. मात्र, आता प्रशासनाने यासर्व कलाकेंद्रांना पुन्हा परवानगी दिल्याने ग्रामस्थांनी शनिवारपासून बेमुदत उपोषणाला सुरुवात केली. सोमवारी तिसऱ्या दिवशीही हे आंदोलन सुरू होते. जामखेड तालुक्यामध्ये जामखेड शहर आणि आसपासच्या काही ठिकाणी अनेक कलाकेंद्रे प्रसिद्ध आहेत. राज्यभरातून अनेक शौकीन याठिकाणी भेट देत असतात. मात्र, एकूणच बाहेरची वर्दळ आणि गुन्हेगारी प्रवृत्तीचा वावर याठिकाणी वाढल्याने स्थानिक सामाजिक आरोग्य धोक्यात आल्याने ग्रामस्थांचा या कलाकेंद्रांना विरोध आहे.
यापूर्वी परिसरातील मोहा, हापटेवाडी, रेडेवाडी, नागेवाडी आदी ठिकाणच्या ग्रामस्थांनी रास्तारोको, बंद या मार्गाने विरोध करत ३ महिन्यांपूर्वी मोहा गावातील सर्व कला केंद्रे बंद पाडण्यास जिल्हा प्रशासनाला भाग पाडले होते. मात्र, गेल्या आठवड्यात ग्रामसभेचा विरोधाचा ठराव असताना जिल्हा प्रशासनाने तब्बल ७ केंद्रांना पुन्हा नूतनीकरणाचे परवाना दाखले दिले आहेत. प्रशासनाच्या या निर्णयामुळे मोहा ग्रामस्थांना समजताच ग्रामस्थांमध्ये संतापाची लाट उसळली आहे. यामुळे गावातील महादेव मंदिरासमोर अनेक महिला-पुरुष ग्रामस्थ गेल्या शनिवारपासून बेमुदत उपोषण आंदोलन करत आहेत. मात्र, गेल्या ३ दिवसांत प्रशासनाने या आंदोलनाकडे लक्षही दिले नसल्याची तक्रार ग्रामस्थांनी केली आहे. तसेच पोलीस प्रशासनाच्या माध्यमातून गावकऱ्यांना आंदोलन मागे घेण्यासाठी दबाव आणत आहेत, असाही आरोप नागरिक करत आहेत.
संपूर्ण परिसरात या कला केंद्रांना विरोध असताना आणि ग्रामसभेचा ठराव असतानाही प्रशासनाने या केंद्रांना परवानगी दिलीच कशी? याबद्दल नागरिकांमध्ये चर्चा सुरू आहे. राज्याचे जलसंधारण मंत्री आणि जिल्ह्याचे पालकमंत्री असलेले राम शिंदे यांचा हा विधानसभा मतदारसंघ आहे. यामुळे जामखेड आणि मोहा परिसरात कलाकेंद्रांना परवानगी कुणाच्या आशीर्वादाने मिळाली, याबाबत नागरिकांमध्ये चर्चा रंगताना दिसत आहेत. ग्रामस्थांनी कोणत्याही परिस्थितीमध्ये माघार न घेता जोपर्यंत कला केंद्रांची दिलेली परवानगी प्रशासन रद्द करत नाही तोपर्यंत आंदोलन सुरूच राहिल, असा पवित्रा घेतला आहे. त्याचबरोबर आंदोलनाची तीव्रता वाढवण्यासाठी मोहा आणि परिसरातील शाळा आणि महाविद्यालये बंद ठेवण्याचा निर्णय ग्रामस्थांनी घेतला आहे. आता पालकमंत्री यामध्ये प्रशासनाला काय आदेश देतात याबद्दल मोठी उत्सुकता आहे.
कलाकारांच्या रोजगारासाठी कला केंद्र सुरू राहू द्या - लोककला जागृतीची विनंती
दुसरीकडे या कलाकेंद्रांसाठी स्थापन झालेल्या लोककला जागृती फाउंडेशनचे गुलशन अंधारे यांनी येथील कला केंद्रावर किमान १ हजार लोकांचे पोटपाणी चालत आहे. त्यामुळे प्रशासन आणि ग्रामस्थांच्या नियम अटींना अधीन राहून आम्ही काम करू, अशी विनंती ग्रामस्थांना केली आहे.
