अहमदनगर - जिल्ह्यातील पर्यावरण संवर्धनासाठी आता जिल्हा प्रशासनाने पुढाकार घेतला आहे. येत्या वटपौर्णिमेपासून जिल्ह्यात 'एक व्यक्ती एक झाड अभियान' राबविले जाणार आहे, अशी माहिती जिल्हाधिकारी डॉ. राजेंद्र भोसले यांनी दिली आहे. या अभियानासाठी जिल्ह्यातील लोकप्रतिनिधी, स्वयंसेवी संस्था, विविध पदाधिकारी यांची मदत घेतली जाणार आहे. या माध्यमातून नगर परिषद, नगरपंचायत हद्दीत लोकसहभागातून सहा लाख 70 हजार वृक्ष लागवड व संवर्धनाचा संकल्प करण्यात आला आहे. येत्या वटपौर्मिमेच्या दिवशी वडाचे रोप लावून या अभियानाची सुरुवात होणार असल्याचं जिल्हाधिकाऱ्यांनी सांगितले.
'प्रदुषणाला आळा घालण्यासाठी वृक्ष लागवड महत्त्वाची'
जिल्हाधिकारी डॉ. भोसले यांनी आज यासंदर्भात जिल्ह्यातील सर्व नगर परिषद, नगर पंचायतीच्या मुख्याधिकाऱ्यांना निर्देश दिले आहेत. कोरोना संकटात प्राणवायू अर्थात ऑक्सिजनची आवश्यकता व मोल अधोरेखीत झाले आहे. ऑक्सिजन पुरवठ्याभावी अनेक रुग्णांना आपला प्राण गमावावा लागला. त्यामुळे हवेतील प्राणवायूचे पर्याप्त मात्रेत वृद्धी व संतुलन राखने महत्त्वाचे आहे. वृक्ष लागवडीमुळे पर्यावरणाचे प्रदुषण कमी होण्यास मदत होईल, यासाठी हा उपक्रम राबवण्यात येत असल्याची माहिती जिल्हाधिकाऱ्यांनी दिली.
हेही वाचा - 'भाजपसोबत जुळवून घ्यावे', प्रताप सरनाईकांचे मुख्यमंत्र्यांना पत्र
