अहमदनगर : बीआरएसचे महाराष्ट्रात आपला पक्ष विस्तार करण्याचे काम जोरदार सुरू आहे. अनेक नेते या पक्षात प्रवेश करत आहे. राष्ट्रवादी कॉंग्रेसच्या एका नेत्याने बीआरएसमध्ये प्रवेश केल्याचे समोर येत आहे. घनश्याम शेलार यांची राजकीय कारकीर्द भाजपधून सुरू झाली आहे. नंतर त्यांनी राष्ट्रवादी काँग्रेस पक्षात प्रवेश केला. काही काळ राष्ट्रवादी काँग्रेसचे जिल्हाध्यक्ष म्हणून देखील त्यांनी काम केले. घनश्याम शेलार यांनी राष्ट्रवादीला सोडचिठ्ठी देत पुन्हा त्यांनी पक्ष बदलला व शिवसेनेत गेले होते.
पक्ष सोडण्याचा निर्णय : शिवसेना पक्ष प्रमुख उद्धव ठाकरे यांनी शेलार यांना अहमदनगर लोकसभा मतदारसंघात उमेदवारीचे संकेत दिले होते. त्यानुसार त्यांनी सुरुवातही केली होती. मात्र, युती झाल्याने ही जागा भाजपाकडे गेली होती. त्यामूळे नाराज होऊन शेलार यांनी पक्ष सोडण्याचा निर्णय घेतला होता. पुन्हा ते राष्ट्रवादीत काँग्रेसमध्ये आले होते. 2019 मध्ये राष्ट्रवादी काँग्रेस कडून त्यांना अखेर विधानसभा निवडणुकीची उमेदवारी देण्यात आली होती. त्यावेळी प्रतिस्पर्धी म्हणून भाजपचे बबनराव पाचपुते यांना टक्कर देऊन घनश्याम शेलार यांनी आपली राजकीय ताकद दाखवली होती. मात्र काही हजार मतांनी त्यांना पराभवाला सामोरे जावे लागले होते. काही महिन्यापासून त्यांनी श्रीगोंदा मतदार संघात फिरायला सुरुवात केली होती.
बीआरएसमध्ये प्रवेश केला : अलीकडच्या काळात राष्ट्रवादीमध्ये झालेले फेरबदल आणि राष्ट्रवादीकडून काही वेगळ्या नावांची चर्चा सुरू झाली होती. त्यामुळे घनश्याम शेलार नाराज असल्याचे कार्यकर्ते सांगत होते. त्यामुळे घनश्याम शेलार यांनी अखेर आपला पक्ष सोडण्याचा निर्णय जाहीर केला. आता त्यांनी तेलंगणाच्या मुख्यमंत्र्यांच्या उपस्थितीमध्ये बीआरएसमध्ये प्रवेश केला आहे.
राष्ट्रवादी पक्षाला मोठा धक्का : अहमदनगर जिल्ह्यातील राष्ट्रवादी काँग्रेसचे जिल्हाध्यक्ष राजेंद्र फाळके यांच्या घरावर काळे फासण्याची घटना ताजी असतांनाच अहमदनगर जिल्ह्यातील श्रीगोंदा तालुक्यातील राष्ट्रवादीचा बडा नेता बीआरएस पक्षात गेल्याने राष्ट्रवादी पक्षाला मोठा धक्का बसला आहे. यावर आता राजकीय नेत्यांच्या काय प्रतिक्रिया येतात. पुढे या जिल्ह्यातील काय राजकीय समीकरणे तयार होतात हे पाहणे महत्त्वाचे ठरणार आहे.
हेही वाचा :
- Maharashtra Politics: बीआरएसचे एमआयएमच्या पावलावर पाऊल; बीआरएस भाजपाला अप्रत्यक्षपणे मदत करणारा पक्ष ठरणार का? राजकीय विश्लेषक म्हणतात...,
- BRS office In Nagpur : तेलंगाणाचे मुख्यमंत्री के चंद्रशेखर राव आज नागपुरात; भारत राष्ट्र समितीच्या कार्यालयाचे होणार उद्घाटन
- BRS Meeting in Chhatrapati Sambhajinagar: बीआरएस पक्ष आज करणार छत्रपती संभाजीनगरमध्ये शक्तीप्रदर्शन; भव्य सभेचे आयोजन
