अहमदनगर- महिला व मुलींचे आरोग्य समृद्ध करण्याच्या दृष्टीकोनातून जामखेड येथे बारामती अॅग्रोच्या प्रमुख सुनंदा पवार यांच्या वतीने मार्गदर्शन शिबिराचे आयोजन करण्यात आले होते. ग्रामीण भागातील महिला व मुलींमध्ये आरोग्याबाबत प्रचंड अनास्था असून ग्रामीण भागातील महिला व मुली मासिक पाळीच्या कालावधीमध्ये सॅनिटरी नॅपकीनचा वापर फार कमी प्रमाणात करतात. त्यामुळे अस्वच्छता वाढून त्यांच्यात आजाराचे प्रमाण वाढते. आरोग्य संघटना व युनिसेफ यांच्या सर्वेक्षणातून हे धक्कादायक वास्तव समोर आले आहे. या गंभीर समस्येची दखल घेत बारामती अॅग्रोच्या प्रमुख सौ. सुनंदा पवार व रोहित पवार यांच्या संकल्पना व पुढाकाराने सोबती अंतर्गत 'आई प्रकल्प' बारामती येथे सुरू करण्यात आला आहे.
महिला व मुलींचे आरोग्य समृद्ध करण्याच्या दृष्टीने हे अभियान हाती घेतले असून या अभियानातून चार तालुक्यातील एक लाखाहून अधिक महिला व मुलींना मार्गदर्शन करण्यात आले. याच पार्श्वभूमीवर दि. 15 जुलै रोजी जामखेड येथील महावीर मंगल कार्यालयात महिला व शालेय मुलींना मार्गदर्शन करून आरोग्यविषयी जाणीव व जागृती करण्यात आली. तसेच, मुली व महिलांना मोफत पर्यावरण पूरक सॅनिटरी नॅपकीनचे वाटप करण्यात आले.
