अहमदनगर - येथील एमआयडीसीला पाणीपुरवठा करणारी जलवाहिनी फुटल्याने हजारो लिटर पाणी वाया गेले आहे. पाईपलाईन नेमकी कशाने फुटली हे निश्चित कळू शकलेले नाही. जलवाहिनी रस्त्यालगत असल्यामुळे पाण्याचे मोठे फवारे रस्त्यावरील येणाऱ्या-जाणाऱ्या वाहनांवर उडत असल्याने अपघाताची भीती निर्माण झाली आहे.
या जलवाहिनीच्या दुरुस्तीसाठी पाणीपुरवठा थांबविण्यात आला आहे. त्यानंतर दुरुस्ती करण्यात येणार आहे. या जलवाहिनीतून नगर एमआयडीसीला पाणी पुरवठा होत असतो. एमआयडीसीतील अनेक प्लांटला कुलिंग आणि इतर गोष्टींसाठी मोठ्या प्रमाणात पाणी लागते. मात्र, नेमकी हीच जलवाहिनी फुटल्याने पाणी प्रवाह बंद करण्यात आला आहे. त्यामुळे अनेक प्लांटवर याचा परिणाम झाला आहे. यात हजारो लिटर पाणीही वाया गेले आहे.