अहमदनगर - पशू, पक्ष्यांवर प्रेम करावे असे आपण नेहमीच बोलत असतो. पण, प्रत्यक्ष कृती करताना फारच थोडे लोक दिसतात. अशाच मोजक्या लोकांपैकी एक आहेत, अकोले तालुक्यातील वीरगावचे शेतकरी रामदास अस्वले. त्यांनी आपल्या शेतातील १५ गुंठे जमिनीवर लावलेली ज्वारी पाखरांसाठी राखून ठेवली आहे. तसेच, त्यांना पिण्याच्या पाण्याची व्यवस्था केली आहे. पक्ष्यांची जगण्यासाठीची धडपड पाहून मला हे करावे वाटले, असे ते म्हणतात.
सर्वत्र दुष्काळ पडल्यामुळे पक्षांना पाण्याचे आणि खाण्याचे दुर्भिक्ष जाणवत आहे. पक्षी थोड्याशा अन्नासाठी रानोमाळ भटकत आहेत. त्यामुळे रामदास अस्वले यांनी त्यांच्या शेतातील ज्वारीचे पीक कापण्याऐवजी ते तसेच ठेवण्याचा निर्णय घेतला. आता त्यांच्या शेतात शिवारातील असंख्य जातीची पाखरं दाणे खाण्यासाठी येतात. तसेच, मधमाशांना पिण्यासाठी स्वच्छ पाण्याची व्यवस्था केल्यामुळे मधमाशा देखील त्यांच्या शेतात मुक्कामाला असतात.
माणसं भुकेली राहू नयेत म्हणून शासनाने रेशनची व्यवस्था केली. पण, पाखरांना अशी कोणतीही व्यवस्था नाही. प्रत्येक शेतकऱयाने पक्षांना खाण्यासाठी थोडी सुविधा केल्यास पक्षांसाठी अन्नाची सोय होईल, असे अस्वले म्हणाले. पशू पक्षांना पाणी पिण्यासाठी आपल्या शेतात छोटेसे शेततळे बांधण्याचा मानसही त्यांनी व्यक्त केला.
अस्वलेंच्या शेतात निरनिराळ्या जातीची पाखरे येतात. यात कावळा, चिमणी, दयाळ, साळुंखी, पारवा, कबूतर, हुदहूद, तांबट, लावी, शिंपी, सुर्यपक्षी, राखी, वटवट्या, सातभाई, बुलबुल, शिंजीर, वेडा राघू, सुरंगी, तित्तर, घुबड, कोकीळ, सुगरण, मुनिया, होला, कापशी, गाय बगळा, कोतवाल, चष्मेवाला, वंचक, शराटी अशा विविध प्रजातींच्या पक्षांचा समावेश आहे.
