अहमदनगर- शेवगावचे सुप्रसिद्ध अस्थिरोग तज्ञ व शिवांजली रुग्णालयाचे संचालक डॉ. हंसराज बोडखे यांनी आत्महत्या केली आहे. ही घटना नेवासा तालुक्यातील प्रवरासंगम नजीक घडली. डॉ. बोडखे बेपत्ता झाल्यानंतर त्यांच्या मित्रपरिवाराने मंगळवारी त्यांचा शोध घेतला. त्यांना प्रवरासंगम नदी पात्रात त्यांचा मृतदेह आढळला.
रविवारी रात्री साडे दहा वाजेपासून डॉ. बोडके बेपत्ता होते. त्यानंतर त्यांची गाडी क्र. (एम.एच. १६ बी. झेड. २०५५) ही प्रवरासंगमच्या पुलाजवळ बेवारस अवस्थेत काहींना दिसून आली. त्यानंतर त्यांची बेपत्ता झाल्याची बातमी सोशल मीडियावर प्रसारित झाली होती. नंतर त्यांच्या मित्र परिवाराने त्यांची शोधाशोध केली. परंतु, सोमवारी रात्रीपर्यंत त्यांचा काहीच थांगपत्ता लागला नाही. मंगळवारी त्यांच्या मित्रपरिवाराने व नातलगांनी त्याची शोधाशोध केली असता दुपारी साडेबाराच्या सुमारास त्यांचा मृतदेह प्रवरासंगम परिसरातील मंदिरा शेजारी प्रवरा नदीपात्रात तरंगताना आढळून आला.
डॉ. बोडके यांच्या आत्महत्येचे कारण अद्याप स्पष्ट झालेले नाही. मात्र, आत्महत्या बाबतचे गुढ अद्याप कायम आहे. नेवासा ग्रामीण रुग्णालयामध्ये शवविच्छेदन केल्यानंतर रात्री उशिरा त्यांच्यावर शेगाव येथील अमरधाममध्ये अंत्यसंस्कार करण्यात आले. त्यांच्या मागे आई-वडील, डॉक्टर पत्नी, मुलगा, मुलगी, बहीण असा परिवार आहे. पुढील तपास नेवासा पोलीस करत आहे.
हेही वाचा- 'टायमिंग हुकलं का क्वॉलिटी खराब,' वादग्रस्त वक्तव्यावरुन इंदोरीकर महाराज अडचणीत
