अहमदनगर- जिल्ह्यातील पारनेर तालुक्यातील टाकळी ढोकेश्वर येथील कोविड केअर सेंटरमध्ये पारनेर तालुक्यातील भाजप नेते सुजित झावरे यांनी कोरोना महामारीतून सुटका व्हावी, रुग्णांना आराम मिळून ते बरे व्हावेत म्हणून एका विश्वशांती यज्ञाचे आयोजन केले होते. टाकळी ढोकेश्वर गावात माजी आमदार दिवंगत वसंतराव झावरे कोविड सेंटरची उभारणी करण्यात आली आहे. या ठिकाणी तीनशे रुग्णांची व्यवस्था आहे. सध्या कोरोनावर नेमके औषध नसून विज्ञान कमी पडताना दिसत असल्याचे सांगत तालुक्यातील भाजप नेते सुजित झावरे यांनी थेट कोविड केअर सेंटर मध्येच विश्वशांती यज्ञ आयोजित केला होता. जगावर जेव्हा संकटे येतात त्या वेळी अग्नी पेटवून देवाची आराधना केली जाते असे झावरे यांनी म्हटले आहे.
भाजप नेत्याने कोविड सेंटरमध्ये केला विश्वशांती यज्ञ
झावरे यांच्या विश्वशांती यज्ञाला अंधश्रद्धा निर्मूलन समितीने आक्षेप घेतला असून विज्ञान युगात या प्रकारे अंधश्रद्धेला खतपाणी घालणे कायद्यानुसार गुन्हा असून याबद्दलची तक्रार जिल्हाधिकाऱ्यांकडे करण्यात येणार असल्याचे अंनिसच्या अॅड रंजना गवांदे यांनी सांगितले आहे. कोरोना आजारावर जगातले वैज्ञानिक औषध शोधत असताना थेट कोविड केअर सेंटर मध्ये यज्ञाचे आयोजन करण्याच्या कृतीचा त्यांनी निषेध केला आहे.
राज्यात चर्चेत असलेले आ. निलेश लंके यांचे कोविड सेंटर-
नगर जिल्ह्यातील पारनेर तालुक्याची ओळख म्हणजे जेष्ठ समाजसेवक अण्णा हजारे, तसेच पारनेर विधानसभा क्षेत्रातच पोपटराव पवारांचे आदर्शगाव हिवरेबाजार आहे. सध्या पारनेरचे आ.निलेश लंके यांचे भाळवणी येथील अकराशे बेड चे कोविड सेंटर राज्यात आदर्श कोविड सेंटर म्हणून चर्चेत आहे. तर भाळवणी पासून काही किलोमीटर अंतरावरच सुजित झावरे यांच्या वडिलांच्या नावाने तीनशे बेडचे कोविड सेंटर आहे.
