अहमदनगर - जिल्ह्यात कोरोना साखळी तोडण्यासाठी सर्वेक्षण मोहीम राबविली जात असून, यात गृहभेटी देण्यासाठी आरोग्य पथके तयार करण्यात आली आहेत. या पथकात आरोग्य कर्मचारी, एक अंगणवाडी सेविका आणि एका शिक्षकाचा समावेश करण्यात आला आहे. गावात कोरोना महामारीविषयी जनजागृती व्हावी आणि कोरोणाचे रुग्ण वाढू नये यासाठी राहाता तालुक्यातील खडकेवाके या खेड्यातील मंगल शिंदे या अंगणवाडी सेविका दोन्ही पायाने अपंग असूनही घरोघरी जावून सर्वेक्षणात सहभाग घेत आहे.
अपंग असातनाही वाडी, वस्तींवर भेट देतात
सध्या गावा गावात कोरोनाचे रुग्ण शोधण्याबरोबरच लसीकरणाबद्दल जनजागृती केली जात आहे. त्यासाठी पथकांची नेमणूक करण्यात आली आहे. पथकाकडून रखरखत्या उन्हात दारोदारी वाडी, वसत्यांवर जात नागरिकांकडून माहिती गोळा करण्याचे काम करण्यात येत असून दररोज 50 घरांना भेटी देत माहिती घेतली जात आहे. खडकेवाके येथील मंगल शिंदे यांनी आपले गाव आपलच घर समजून अपंग असूनही कुठेही कमी न पडता स्वत:ला या कामात वाहून घेतले आहे. कधी आपल्या तीन चाकी सायकलवर, तर कधी अपंगांसाठी बनविण्यात आलेल्या मोपेडवरून वाडी, वस्तीवर जावून त्या भेट देत आहेत.
कोरोनाची लक्षणे तपासतात
भेटीदरम्यान शिंदे या घरातील सर्व सदस्यांचे तापमान, ऑक्सिजन पातळी, पल्स रेट, तसेच कोरोनाची इतर लक्षणे त्या तपासतात. ही तपासणी करून संशयित रुग्ण असतील तर त्याची अँटिजेन किंवा आरटीपीसीआर टेस्ट करण्यासाठी संबंधित प्राथमिक आरोग्य केंद्राकडे पाठवतात. अंपग असतानाही कामात कमी न पडता कोरोनाबद्दल पसरलेली भीती आणि गैरसमज दूर करण्याचे काम मंगल शिंदे करत आहे. मंगल शिंदे आणि त्यांचे पती हे दोघेही अपंग आहे. मात्र, दोघेही एकमेकांना साथ देऊन सध्या आपले काम करत आहे.
हेही वाचा - कोरोना लसींसाठी हद्दीचा संघर्ष, अ‍ॅपमध्ये दुरुस्तीची गरज
राहाता तालुक्यातील खडकेवाके तसे दोन हजार लोकवस्तीचे गाव आहे. येथील बहुतांशी लोक शेतीचे करत असल्याने वाडी, वस्त्यांवर लोक विखुरलेले आहेत. त्यामुळे, दररोज मंगल शिंदे यांना वस्तीवर जाऊन नागरिकांची काळजी घ्यावी लागते. त्याचबरोबर, शालेय पोषण आहार वाटपही करावा लागतो. गेल्या काही दिवसांपासून प्रशासन आणि अशा आरोग्य सेविकांच्या प्रयत्नांमुळे आज गावात झीरो कोरोना पेशंट अशी स्थिती आहे.
हेही वाचा - लसीकरणाआधी कोरोनाची रॅपीड अँटीजन टेस्ट करणे आता गरजेचे
