अहमदनगर - प्रवाशांच्या सेवेसाठी अशी ओळख असलेली लालपरी लॉकडाऊननंतर आता पुन्हा एकदा जोमात धावू लागली आहे. एकट्या नगर जिल्ह्यात सप्टेंबर महिन्यात एसटीने जवळपास अडीच कोटींचे उत्पन्न मिळवले आहे.
कोरोनाच्या प्रादुर्भावामुळे एसटी सेवा बंद करण्यात आली होती. पण आता हळूहळू अनलॉकची प्रक्रिया राबवण्यात येत आहे. यात एसटी सुरू करण्यात आली आहे. राज्यात क्षेत्रफळाने सर्वात मोठ्या असलेल्या अहमदनगर जिल्ह्यातील सर्व अकरा आगारातून पूर्ण क्षमतेने प्रवासी वाहतूक आता सुरू झाली आहे.
अनलॉकच्या सुरुवातीच्या टप्यात जिल्हाअंतर्गत एका सीटवर एक प्रवासी या पद्धतीने एसटी प्रवासाला परवानगी मिळाली. याला प्रवाशांचा प्रतिसाद मिळाला नाही. मात्र 20 ऑगस्टपासून अनलॉकच्या पुढील टप्यात आंतर जिल्हा पूर्ण क्षमतेने प्रवासाला परवानगी मिळाल्यानंतर एसटीला चांगला प्रतिसाद मिळू लागला आहे. एकट्या नगर जिल्ह्यात सप्टेंबर महिन्याचे उत्पन्न दोन कोटी 41 लाख इतके जमा झाले आहे.
सध्या नगर जिल्ह्यातील अकरा आगारातून रोज 407 फेऱ्या सुरू आहेत. कोरोनाच्या पार्श्वभूमीवर एसटीकडून सर्व योग्य ती काळजी घेत प्रवाशांना सुरक्षित ठेवण्याचा प्रयत्न केला जात आहे. तसेच अनेक आंतरजिल्हा लांब पल्याच्या फेऱ्या सुरू केल्याने प्रवाशांचा प्रतिसाद मिळताना दिसून येत आहे.
हेही वाचा - शिर्डी नगराध्यक्षपदासाठी नगरसेवकांमध्ये जोरदार लॉबिंग; विखेंच्या भूमिकेकडे सर्वांचे लक्ष
हेही वाचा - कायदा-सुव्यवस्था सांभाळण्यात पोलीस कमी पडताहेत, हाथरस घटनेवर अण्णा हजारेंची उद्विग्न प्रतिक्रिया
