अहमदनगर - जामखेडच्या कुसडगावात एका ३२ वर्षाच्या महिलेसह तीन मुलींंचे मृतदेह विहिरीत आढळल्याने परिसरात खळबळ उडाली आहे. रक्षाबंधनच्या पूर्व संध्येला हा प्रकार समोर आल्याने याबाबत विविध शंका उपस्थित होत आहेत.
तीन मुलींसह शेतात गेलेली महिला घरी परतलीच नाही. काल(रविवारी) सायंकाळी साडेसहाच्या सुमारास या चौघींच्या चपला विहिरीवर दिसल्या. शोधाशोध केल्यानंतर या चौघांचे मृतदेह विहिरीत आढळून आले.
संबंधित घटनेची माहिती मिळताच जामखेड पोलीस घटनास्थळी पोहोचले. त्यांनी चौघींचे मृतदेह ताब्यात घेतले असून शवविच्छेदनासाठी जामखेड ग्रामीण रुग्णालयात पाठवण्यात आले आहे. हा प्रकार अपघात आहे, की घातपात याबद्दल अद्याप अस्पष्टता कायम असून पोलीस अधिक तपास करत आहेत.
विहिरीबाहेरील चपला...आणि शोध सुरू!
जामखेड तालुक्यातील कुसडगाव येथील रामभाऊ कारले यांच्या पत्नी स्वाती कारले (वय 32 वर्ष) मुलगी अंजली (१२ वर्षे) दोन नंबरची मुलगी सायली आणि तीन नंबरची मुलगी कोमल (वय ७ वर्षे) या चौघीही रविवारी सकाळी 11 वाजता शेतात गेल्या होत्या. मात्र शेतातून परतताना रस्त्यालगतच्या विहिरीच्या काठावर या चौघींच्या चपला इतरांना आढळून आल्या. मात्र या चौघीही न दिसल्याने शंका उपस्थित झाली. यानंतर चौघांचे मृतदेह त्या विहिरीत आढळून आले.
घटनेची माहिती मिळताच तहसीलदार विशाल नाईकवाडे व पोलीस निरीक्षक प्रभाकर पाटील यांनी घटनास्थळी भेट दिली.
