पुणे - महाराष्ट्र केसरी स्पर्धेच्या अंतिम लढतीत नाशिकच्या हर्षवर्धन सदगीरने बाजी मारली. त्याने लातूरच्या शैलेश शेळकेचा ३-२ ने पराभव करत मानाची गदा पटकावली. विजयाची घोषणा झाल्यानंतर हर्षवर्धनने उपविजेता सहकारी मल्ल शैलेश शेळकेला खांद्यावर उचलून घेत खिलाडूवृत्ती दाखवत, मैत्रीचे दर्शन घडवले. दोस्तीत कुस्ती नाही, मात्र कुस्तीत दोस्ती नाही असे म्हटले जाते, याचा प्रत्यय पुण्यात महाराष्ट्र केसरीच्या निमित्ताने पाहायला मिळाला.
हर्षवर्धनने अखेरच्या काही सेंकदात लढत जिंकली. विजयाची घोषणा सरपंचांनी केली तेव्हा हर्षवर्धनला आनंद तर झालाच. मात्र त्याच आनंदात हर्षवर्धनने खिलाडू वृत्तीचे दर्शन घडवले. त्याने प्रतिस्पर्धी आणि त्याचा सहकारी असलेला शैलेश शेळकेला खांद्यावर उचलून घेतले. त्याची ही कृती पाहता त्याने फक्त महाराष्ट्र केसरीची गदाच जिंकली नाही तर उपस्थितांची मनंही जिंकली.
शैलेश आणि हर्षवर्धन दोघेही वस्ताद काका पवार यांच्या तालमीत तयार झालेले मल्ल. यामुळे दोघांना एकमेकाचे डाव माहित होते. त्यामुळे सुरूवातीला सामना संथ झाला. मात्र, अखेरच्या दोन मिनिटात हर्षवर्धनने चांगला खेळ केला. त्याने शेवटच्या २० सेंकद राहिलेले असताना २ गुणांचा डाव टाकत बाजी मारली आणि महाराष्ट्र केसरीच्या गदेवर आपले नाव कोरले.
हेही वाचा - नाशिकचा हर्षवर्धन सदगीर नवा 'महाराष्ट्र केसरी'.. लातूरच्या शेळकेवर मात
हेही वाचा - महाराष्ट्र केसरीची गदा जिंकल्यानंतर हर्षवर्धन म्हणाला, दोघा भावांमध्ये लढत झाली...
