सोलापूर - शहरात अज्ञात तरुणांनी युवा फुटबॉलपटू प्रदिप अलाटला जबर मारहाण केली. प्रदिपचा या मारहाणीत मृत्यू झाला. दरम्यान, या घटनेची पोलिसात तक्रार दाखल करण्यात आली असून शहरात खळबळ उडाली आहे.
मिळालेल्या माहितीनुसार, २६ वर्षीय प्रदिप अलाट हा फुटबॉल प्रशिक्षक म्हणून शहरातील अनेक इंग्रजी शाळांमध्ये काम पाहत असे. शुक्रवारी अज्ञात तरुणांनी त्याला जबर मारहाण केली. प्रदिप या मारहाणीत गंभीर जखमी झाला. तेव्हा त्याला गंगामाई रुग्णालयात उपचारासाठी दाखल करण्यात आले.
मात्र, डॉक्टरांनी त्याला उपचारापूर्वीच मृत घोषित केले. महत्वाची बाब म्हणजे, मारहाण करणाऱ्या तरुणांनीच त्याला रुग्णालायत दाखल केले होते. डॉक्टरांनी प्रदिपला मृत घोषित केले. तेव्हा त्या तरुणांनी तिथून पळ काढला.
प्रदिप शहरातील सरस्वती विद्यालय, श्राविका विद्यालय, हिंदुस्थान कॉन्व्हेंट स्कूल या शाळांमधील विद्यार्थ्यांना फुटबॉलचे धडे देत होता. दरम्यान, प्रदिप उच्च शिक्षण घेत होता. घरची परिस्थिती बेताचीच असल्याने तो फुटबॉल प्रशिक्षक म्हणून काम करत होता.
तक्रार दाखल -
प्रदिप अलाट प्रकरणात चेतन गायकवाड याच्यासह चौघांविरुद्ध विजापूर नाका पोलीस ठाण्यात तक्रार दाखल करण्यात आली आहे. प्रदिपची आई उषा आलट यांनी ही तक्रार दाखल केली आहे. याबाबत अधिक तपास पोलीस करत आहेत.
हेही वाचा - क्रिकेट खेळताना झालेल्या वादातून मित्रावर चाकू हल्ला; दोघांवर गुन्हा दाखल
हेही वाचा - महाडच्या डॉ. आंबेडकर महाविद्यालयात शिक्षकांच्या दोन गटात हाणामारी
