पराभवाचा वचपा..! भारताचा इंग्लंडवर ३१७ धावांनी दणदणीत विजय

कालच्या ३ बाद ५३ धावांवरून इंग्लंडने आज चौथ्या दिवशी पुढे खेळण्यास सुरुवात केली. मात्र, भारताचे फिरकीपटू अक्षर पटेल आणि रवीचंद्र अश्विनपुढे इंग्लंडच्या फलंदाजांनी हाराकिरी पत्करली. इंग्लंडचा संघ दुसऱ्या डावात १६४ धावांत सर्वबाद झाला.

चेन्नई - चेपॉक मैदानावर रंगलेल्या दुसऱ्या कसोटी सामन्यात भारताने इंग्लंडवर ३१७ धावांनी दणदणीत विजयाची नोंद केली आहे. सामन्याच्या चौथ्या दिवशीच विराटसेनेने इंग्लंडची भंबेरी उडवत पहिल्या कसोटीतील पराभवाचा वचपा काढला. भारताच्या ४८२ धावांच्या आव्हानाचा पाठलाग करताना इंग्लंडचा संघ दुसऱ्या डावात १६४ धावांत आटोपला. पदार्पणाची कसोटी खेळणाऱ्या अक्षर पटेलने ५ बळी घेत इंग्लंडच्या डावाला खिंडार पाडले. या विजयासह भारताने कसोटी मालिकेत १-१ अशी बरोबरी साधली. सामन्यात अष्टपैलू कामगिरी नोंदवणाऱ्या भारताच्या रवीचंद्रन अश्विनला सामनावीर पुरस्काराने गौरवण्यात आले आहे.

चौथा दिवस भारताचा...

कालच्या ३ बाद ५३ धावांवरून इंग्लंडने आज चौथ्या दिवशी पुढे खेळण्यास सुरुवात केली. डॅनियल लॉरेन्स व कर्णधार जो रूटकडून संघाला चांगल्या भागीदारीची अपेक्षा होती. पण, अश्विनने ही जोडी फोडली. अश्विनने लॉरेन्सला बाद करत इंग्लंडला चौथा झटका दिला. लॉरेन्स २६ धावा काढून बाद झाला. त्यानंतर आलेला बेन स्टोक्सही ८ धावांवर तंबूत परतला. अश्विननेच स्टोक्सला बाद केले. त्यानंतर आलेला ओली पोप पदार्पणवीर अक्षर पटेलचा बळी ठरला. तर, बेन फोक्सला कुलदीप यादवने बाद केले. मैदानात स्थिरावलेला कर्णधार रूटनेही विजयाची आशा सोडली. अक्षरने त्याला ३३ धावांवर बाद केले. उपारापर्यंत इंग्लंडचे सात फलंदाज तंबूत परतले. दुसऱ्या सत्रात मोईन अलीने फटकेबाजी करत भारताचा विजय लांबवला. मोईन अलीने १८ चेंडूत ५ षटकार आणि ३ चौकारांसह ४३ धावा केल्या. कुलदीपच्या वळलेल्या चेंडूवर तो यष्टिचित झाला आणि इंग्लंडचा डाव संपुष्टात आला. भारताकडून अक्षरने ६० धावांत ५ बळी घेतले. तर, अश्विनला ३ बळी घेता आले. कुलदीप यादवला २ बळी मिळाले.

फिरकीपटूंसमोर बिथरले इंग्लंडचे शिलेदार...

टीम इंडियाचा अष्टपैलू खेळाडू रवीचंद्रन अश्विनच्या शतकामुळे भारताने इंग्लंडसमोर विशाल आव्हान ठेवले. भारताने दुसऱ्या डावात २८६ धावा केल्या. त्यामुळे इंग्लंडला उर्वरित दोन दिवसात ४८२ धावांचे आव्हान मिळाले. प्रत्युत्तरात दुसऱ्या डावात फलंदाजीला आलेल्या इंग्लंडच्या रोरी बर्न्सने इशांत शर्माच्या पहिल्याच चेंडूवर चौकार ठोकत आपला इरादा स्पष्ट केला. मात्र, दुसऱ्या बाजूला असलेल्या डॉमिनिक सिब्लेला फिरकीपटू अक्षर पटेलने पायचित पकडले. सिब्लेने ३ धावा केल्या. त्यानंतर आक्रमक खेळणाऱ्या रोरी बर्न्सला अश्विनने विराटकरवी झेलबाद केले. नाईट वॉचमन म्हणून बढती मिळालेला जॅक लीच शुन्यावर बाद झाला. अक्षरला लीचच्या रुपात दुसरा बळी मिळाला. फिरकीपटूंना साथ देणाऱ्या खेळपट्टीवर इंग्लंडचे फलंदाज बिथरताना दिसले. तिसरा दिवस संपण्यापूर्वी इंग्लंडचा कर्णधार जो रूटला 'अंपायर्स कॉल'मुळे काल एक जीवदान मिळाले होते.

संक्षिप्त धावफलक -

• नाणेफेक - भारत (फलंदाजी)
• भारत पहिला डाव - ३२९/१० (रोहित शर्मा १६१, मोईन अली ४७/३)
• इंग्लंड पहिला डाव - १३४/१० (बेन फोक्स ४२, रवीचंद्रन अश्विन ४३/५)
• भारत दुसरा डाव - २८६/१० (रवीचंद्रन अश्विन १०६, मोईन अली ९८/४)
• इंग्लंड दुसरा डाव - १६४/१० (मोईन अली ४३, अक्षर पटेल ६०/५)
• सामनावीर - रवीचंद्रन अश्विन (पहिल्या डावात गोलंदाजीत ५ बळी, दुसऱ्या डावात शतकी खेळी, दुसऱ्या डावात गोलंदाजीत ३ बळी)