लंडन - भारतीय संघाचा यष्टीरक्षक फलंदाज ऋषभ पंत अनेकवेळा बेजबाबदार फटका मारून बाद झाल्याने टीकेचा धनी ठरला आहे. परंतु भारतीय संघाचा कर्णधार विराट कोहलीने ऋषभ पंतची पाठराखण केली. तो म्हणाला की, त्याला त्याच्या नैसर्गिक शैलीत फलंदाजी करण्याची मोकळीक आहे.
भारत आणि इंग्लंड यांच्यातील पहिला कसोटी सामना पाचव्या आणि अखेरच्या दिवशी पावसामुळे ड्रॉ झाला. परंतु भारताला या सामन्यात विजयाची संधी होती. भारतीय संघ विजयापासून फक्त 157 धावा दूर होता. तर भारताचे 9 गडी शिल्लक होते. परंतु पावसामुळे पाचव्या दिवसाचे खेळ होऊ शकला नाही. पण या सामन्यातील पहिल्या डावात ऋषभ पंतने आक्रमक खेळी केली होती. पण त्याला या खेळीचं मोठ्या आकड्यात रुपांतर करता आले नाही
पंतविषयी कर्णधार विराट कोहली म्हणाला, त्याची ही नैसर्गिक शैली आहे. तो अशाच पद्धतीने फलंदाजी करतो. परिस्थिती ओळखून फलंदाजी करण्यात तो माहीर आहे. प्रत्येक वेळी त्याला संयमी खेळी करण्याची गरज नाही. सामन्याच्या कोणत्याही क्षणी तो खेळ पालटू शकतो. जर एखादा सामना वाचवण्याचा आम्ही प्रयत्न करतो. तेव्हा तो असे बेजबाबदार फटके खेळत नाही. जेव्हा 50-50 टक्के संधी असते. तेव्हा तो चान्स घेतो. तो तसाच प्रकारे फलंदाजी करतो. आम्ही देखील त्याच्याकडून अशाच फलंदाजीची अपेक्षा करतो.
विराटला अजिंक्य रहाणेच्या फॉर्मविषयी विचारले असता त्याने ही चिंतेची बाब नसल्याचे सांगितलं. मागील सामन्यात केएल राहुल, जडेजा, बुमराह ऋषभ पंत यांनी चांगली खेळी केली. तसेच रोहितने चांगली सुरूवात दिली. प्रत्येक जण आपलं योगदान देत असल्याचे विराट म्हणाला.
शार्दुल ठाकूरला पहिल्या कसोटी सामन्यात दुखापत झाली. यामुळे तो दुसऱ्या कसोटी सामन्यात खेळणार नाही. याविषयी विराटला विचारले तर तो म्हणाला की, ही बाब चिंता करण्याची नाही कारण आमच्याकडे अनेक पर्याय उपलब्ध आहेत. चांगली बाब ही आहे की पहिल्या सामन्यात रविंद्र जडेजाने धावा केल्या. त्यामुळे दुसऱ्या सामन्यात तो आत्मविश्वासाने मैदानात उतरेल. आमची फलंदाजी खोलवर आहे. यात तळातील फलंदाज देखील योगदान देतात. शार्दुलकडे फलंदाजी करण्याचे कौशल्य आहे. परंतु फलंदाजीच्या बाबतीत आमची स्थिती चांगली आहे. पुजारा, रहाणे आणि मी धावा करण्यात अपयशी ठरलो. यामुळे इतर फलंदाजांना संधी मिळाली, असे देखील विराट म्हणाला. दरम्यान, उभय संघातील दुसऱ्या सामन्याला उद्या गुरूवारपासून सुरूवात होणार आहे.
हेही वाचा - IND vs ENG: भारत-इंग्लंड संघाला दंड, आयसीसीची कारवाई
हेही वाचा - वडिलांच्या आठवणीत भावूक झाली 'हॅट्ट्रिक गर्ल' वंदना कटारिया, पाहा व्हिडिओ
