लाहोर - पाकिस्तानचा वेगवान गोलंदाज हसन अली त्याच्या पाठीच्या दुखापतीतून सावरत आहे. हसनने गेल्या आठवड्यात व्हर्च्युअल रिहॅब सत्र केले होते. त्यानंतर, हसनवर कदाचित शस्त्रक्रियेची आवश्यकता नसेल आणि लवकरच तो स्पर्धात्मक क्रिकेटमध्ये परत येईल, असे डॉक्टरांनी सांगितले.
यासाठी पाकिस्तान क्रिकेट बोर्ड हसनला आर्थिक मदतीचा हात देणार आहे. केंद्रीय करारातून वगळल्यामुळे पीसीबी हसनला ही मदत करणार आहे. पीसीबीचे मुख्य कार्यकारी अधिकारी (सीईओ) वसीम खान म्हणाले, "हसन अली हा आमचा वारसा आहे आणि आयसीसी चॅम्पियन्स ट्रॉफी 2017चा नायक आहे. या कठीण काळात त्याची काळजी घेणे पीसीबीची जबाबदारी आहे, जेणेकरून तो आपल्या तंदुरुस्तीवर काम करू शकेल."
लाहोरचे न्यूरो सर्जन आसिफ बशीर, ऑस्ट्रेलियाचे पीटर ओ सुलिवन आणि पाकिस्तान क्रिकेट बोर्डाच्या वैद्यकीय पथकाच्या मार्गदर्शनाखाली हसनने गेल्या आठवड्यात दोन तासांचे ऑनलाइन रिहॅब सत्र पूर्ण केले होते.
पीसीबीच्या वैद्यकीय व क्रीडा विज्ञान संघाचे संचालक सोहेल सलीम म्हणाले, "हसन अलीला एकाच वर्षी एकाच जागेवर दोनदा दुखापत झाली आहे आणि ही सामान्य गोष्ट नाही. आम्ही अनुभवी तज्ज्ञांशी बोललो. हसनचे रिहॅब सत्र चांगले चालले आहे, हे ऐकून आनंद झाला."
ते पुढे म्हणाले, ''तरीही, हे रिहॅबचे सुरुवातीचे दिवस आहेत आणि पुढील पाच आठवड्यांपर्यंत आम्ही त्याची प्रगती पाहू निर्णय घेऊ.''
