साऊथम्प्टन - विंडीजचा कर्णधार जेसन होल्डरच्या सहा बळींच्या जोरावर इंग्लंडचा संघ पहिल्या डावात 204 धावांत आटोपला आहे. दुसऱ्या दिवशी पाच बाद 106 धावांवरून खेळण्यास इंग्लंडने सुरुवात केली. कर्णधार स्टोक्स आणि बटलर यांनी सहाव्या विकेटसाठी 67 धावांची भागीदारी रचली. या दोघानंतर इंग्लंडचा संघ ढेपाळला. स्टोक्सने 7 चौकारांसह 43 तर बटलरने 6 चौकारांसह 35 धावा केल्या. विंडीजकडून होल्डने 42 धावांत 6 तर शेनन गॅब्रियलने 62 धावांत 4 बळी घेतले.
त्यानंतर, वेस्ट इंडिज संघाने आपल्या पहिल्या डावाला सुरुवात केली आहे. दुसऱ्या दिवसाचा खेळ संपला तेव्हा विंडीजच्या संघाने 19.3 षटकात एक बाद 57 धावा केल्या होत्या. क्रेग ब्रेथवेट 20 तर शाय होप 3 धावांवर खेळत आहे. सलामीवीर जॉन कॅम्पबेलला जेम्स अँडरसनने माघारी धाडले.
तत्पूर्वी, पावसामुळे उभय संघातील पहिले सत्र वाया गेले होते. कोरोनानंतरच्या पहिल्या आंतरराष्ट्रीय आणि ऐतिहासिक सामन्यात नाणेफेक जिंकून इंग्लंडने प्रथम फलंदाजीचा निर्णय घेतला. इंग्लंडची सुरूवात खराब झाली. सलामीवीर सिब्ले शून्यावर माघारी परतला. तर बर्न्सने 30 धावांचे योगदान दिले.
कोरोनामुळे मार्चच्या मध्यापासून क्रिकेट बंद आहे. तब्बल तीन महिन्यांच्या विश्रांतीनंतर इंग्लंड आणि वेस्ट इंडीज संघातील कसोटी मालिकेतून क्रिकेट परतले आहे. या स्पर्धेचा पहिला सामना बुधवारपासून सुरू झाला. तथापि, कोरोनाच्या आजाराच्या पार्श्वभूमीवर आयसीसीने काही बदल केले आहेत, त्यानुसार ही मालिका रिकाम्या स्टेडियममध्ये प्रेक्षकांशिवाय खेळवली जात आहे.
संघ -
इंग्लंड प्लेईंग XI : बेन स्टोक्स (कर्णधार), जेम्स अँडरसन, जोफ्रा आर्चर, रोरी बर्न्स, डोम बेस, जोस बटलर (यष्टीरक्षक), जॅक क्रॉले, जोए डेन्ले, ओली पोप, डोम सिब्ले, मार्क वुड.
वेस्ट इंडीज प्लेईंग XI : जेसन होल्डर (कर्णधार), जर्मेने ब्लॅकवुड, क्रेग ब्राथवेट, शारमहा ब्रूक्स, जॉन कॅम्पबेल, रोस्टन चेस, शेन डॉवरिच, शेनन गॅब्रिएल, शाई होप, अल्झारी जोसेफ, केमार रोच.
